İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 372 Hüküm no: 367 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Nikola v. Yorgi ve diğer Nikola v. Mihal’in nısfiyet üzere iştiraken mâlik oldukları bakkal dükkânının Hüseyin Ağa b. İsmail’e satıldığı Balık Pazarında Kara Mehmed dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde bâ‘isü’l-kitâb kendi nefsinden asıl mahrûse-i Galata Yağ Kapanı tüccârından Hüseyin Ağa b. İsmail tarafından husûs-ı âti’l-beyânı tasdîka vekîl-i şer‘îsi kapan-ı merkūm nâzırı Süleyman Ağa b. el-Hâc Abdurrahman mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Balık Pazarı nâm mahâlde zikr olunan kırk yedi bâb dekâkin ve mağazalardan Kara Mehmed dükkânı demekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken mâlikler olan Nikola v. Yorgi ve diğer Nikola v. Mihal nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan sekiz bin beş yüz guruşa asıl-ı mezbûr Süleyman Ağa ile müvekkil-i mezbûr Hüseyin Ağa’ya ale’l-iştirâki’s-seviyy bi’l-memûriye bey‘ ve temlik ve teslîm eylediğimde onlar dahi ber-vech-i muharrer iştirâken iştirâ ve temellük ve tesellüm ve kabz ü kabûl ve semeni olan meblağ-ı merkūm sekiz bin beş yüz guruşu bana def‘ ü teslîm eylediklerinde ben dahi yedlerinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i merkūmede firârî-i mesfûrûnun ve cânib-i mîrî ve tüccâr ve esnâfdan kimesnenin alâka ve medhali kalmayup i‘tibâr-ı mezkûr üzere altmış sehmi asıl-ı mezbûr Süleyman Ağa’nın ve altmış sehmi müvekkil-i mezbûr Hüseyin Ağa’nın mâl-ı müşterâları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 C sene 1238. Şühûdü’l-hâl: Eş-şâhidûne’s-sâbıkūn.