İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 371 Hüküm no: 366 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Manol v. Yorgi, Nikola v. Yani ve Yorgi v. Atam’ın iştiraken mâlik oldukları bakkal dükkânının Ahmed Alemdar Ağa b. Seyyid Mehmed’e satıldığı Odunkapısı’nda Kutucularbaşı’nda Mehmed Efendi dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde Mahmiye-i İstanbul Bal Kapanı nâzırı olan işbu bâ‘isü’l-kitâb es-Seyyid el-Hâc Ahmed Alemdar Ağa b. es-Seyyid Mehmed mahzarında bi’l-memûriye ikrâr-ı tam ve takrîr-i kelâm edip mahmiye-i mezbûre hısnı ebvâbından Odunkapısı dâhilinde kutucular başında vâki‘ zikr olunan kırk yedi bâb dekâkin ve mağazalardan Mehmed Efendi dükkânı demekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuz beş sehmine Manol v. Yorgi ve kırk beş sehmine Nikola v. Yani ve kırk sehmine Yorgi v. Atam nâm zimmîler mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle firârî-i mesfûrûnun ber-vech-i muharrer mâlikler oldukları âlât-ı lâzıme-i mezkûre cânib-i mîrîden zabt ve tüccâra nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan sekiz bin guruşa bi’l-memûriye mezbûr es-Seyyid el-Hâc Ahmed Alemdar Ağa’ya << merkūm sekiz bin guruşu bana def‘ >> bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm sekiz bin guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmuna teslîm eyledim fîmâ-ba‘d âlât-ı lâzıme-i mezkûrede firârî-i mesfûrûnun ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr es-Seyyid el-Hâc Ahmed Alemdar Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene [1]238. Şühûdü’l-hâl: Eş-şâhidûne’s-sâbıkūn.