İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 374 Hüküm no: 369 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Hıristo Dolkarar v. Tarandafil’in mâlik olduğu otuz sehm bakkal dükkânı hissesinin Abdullah Ağa b. Abdullah’a satıldığı Kasımpaşa’da Kulaksız nâm mahâlde şeyh dükkânı Kezâlik hâzır oldukları hâlde meclis-i şer‘-i şerîf-i hatîr-i lâzımü’t-tevkīrde bâ‘isü’l-kitâb el-Hâc Abdullah Ağa b. Abdullah nâm kimesne tarafından husûs-ı âti’l-beyânı tasdîka vekîl-i şer‘îsi İstanbul Bal Kapanı nâzırı es-Seyyid el-Hâc Alemdar b. Mehmed mahzarında bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da Kulaksız nâm mahâlde vâki‘ zikr olunan kırk yedi dekâkin ve mağazalardan Şeyh dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan sehmi müvekkil-i mezbûr el-Hâc Abdullah Ağa’nın mâlı olup mâ‘adâsı olan otuz sehmine mâlik olan Hıristo Dolkarar v. Tarandafil nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle âlât-ı lâzıme-i mezkûreden mâlik olduğu otuz sehm hisse-i merkūmesini cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i merkūmeden otuz sehm hisse-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan üç yüz otuz guruşa müvekkil-i mezbûr el-Hâc Abdullah Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz otuz guruşu bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin doksan sehmi mukaddemâ mezbûr el-Hâc Abdullah Ağa’nın mâlı olup mâ‘adâsı olan otuz sehminde dahi firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup müvekkil-i mezbûr el-Hâc Abdullah Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 Ş sene 1238. Şühûdü’l-hâl: Eş-şâhidûne’s-sâbıkūn.