İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 374 Hüküm no: 370 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Hıristo v. Atam’ın mâlik olduğu bakkal dükkânının Tulumbacı Seyyid Hüseyin Ağa b. Osman’a satıldığı Yeniodalar kurbünde Karaki kapısında Zağarcıbaşı dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde mahmiye-i İstanbul’da Bal Kapanı tüccârından işbu bâ‘isü’l-kitâb Tulumbacı es-Seyyid el-Hâc Hüseyin Ağa b. Osman mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede Yenioda kurbünde Karaköy kapısında vâki‘ zikr olunan kırk yedi bâb dekâkin ve mağazalardan Zağarcıbaşı dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle müstakıllen mâlik olan Hıristo v. Atam nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle mâlik olduğu âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dokuz yüz guruşa mezbûr Tulumbacı es-Seyyid el-Hâc Hasan Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabûl ve semeni olan meblağ-ı merkūm dokuz yüz guruşu bana def‘ ü teslîm eylediğinde ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrun ve cânib-i mîrî ve esnâfdan kimesnenin alâka ve medhali kalmayup mezbûr Tulumbacı es-Seyyid el-Hâc Hüseyin Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 C sene 1238. Şühûdü’l-hâl: Eş-şâhidûne’s-sâbıkūn.