İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 378 Hüküm no: 374 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Todori ve Yani v. Ademi’nin iştirâken mâlik oldukları bakkal dükkânlarının Hasan Ağa b. Abdülhamid ve Molla Salih b. Mehmed’e satıldığı Zindân kapısı hâricinde Kiryako mahzeni demekle şehîr yağcı bakkāl mahzeni İhrâc şüd fî 3 C sene [12]49. Hâmişi fî 20 Receb sene [12]39. Kezâlik hâzır oldukları hâlde meclis-i şer‘-i << hatîr-i lâzımü’t-tevkīrde >> şerîf-i enverde bâ‘isü’l-kitâb kendi nefsinden asıl ve mahrûse-i Galata Yağ Kapanı tüccârından Molla Salih b. Mehmed nâm kimesne tarafından husûs-ı âti’l-beyânı tasdîka vekîl-i şer‘îsi yine kapan-ı merkūm tüccârından Hasan Ağa b. Abdülhamid nâm kimesne mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde içinde vâki‘ zikr olunan kırk yedi bâb dekâkin ve mağazalardan Kiryako mahzeni demekle şehîr ma‘lûmü’l-hudûd bir bâb yağcı bakkāl mağazası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye iştirâken mâlikler olan Todori ve Yani veledey Ademi nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dört bin iki yüz elli guruşa asıl-ı mezbûr Hasan Ağa ile müvekkil-i merkūm Molla Salih’e ale’l-iştirâki’s-seviyy bi’l-memûriye bey‘ ve temlik ve teslîm eylediğimde onlar dahi ber-vech-i muharrer iştirâken iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin iki yüz elli guruşu bana def‘ ü teslîm eylediklerinde ben dahi yedlerinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup nısfı asıl-ı mezbûr Hasan Ağa’nın ve nısf müvekkil-i mezbûr Molla Salih’in mâl-ı müşterâları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 B sene [1]238. Şühûdü’l-hâl: Eş-şâhidûne’s-sâbıkūn.