İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 377 Hüküm no: 373 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Todori v. Kostandi, Esbiro v. Niyago, Nikoli v. İsmaki ve Niyago v. Atam’ın iştiraken mâlik oldukları bakkal dükkânlarının Abdülgani Beşe b. Mustafa ve Ahmed Beşe b. Mahmud’a satıldığı Kasımpaşa’da Dörtkuyu nâm mahâlde Hasan Ağa dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Abdülgani Beşe b. el-Hâc Mustafa ve Ahmed Beşe b. Mahmud nâm kimesneler mahzarlarında bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da Dörtkuyu nâm mahâlde vâki‘ zikr olunan kırk yedi bâb dekâkin ve mağazalardan Hasan Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibâriyle otuz sehmine Todori v. Kostandi ve otuz sehmine Esbiro v. Niyago ve otuz sehmine Nikoli v. İsmaki ve otuz sehmine Niyago v. Atam nâm zimmîler iştirâken mâlikler iken bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin üç yüz beş guruşa mezbûrân es-Seyyid Abdülgani Beşe ve Ahmed Beşe’ye ale’l-iştirâki’s-seviyy bi’l-memûriye bey‘ ü temlik ve teslîm eylediğimde onlar dahi iştirâken yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin üç yüz beş guruşu bana def‘ ü teslîm ben dahi yedlerinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrûnun ve cânib-i mîrî ve tüccâr ve esnâfdan kimesnenin alâka ve medhalleri kalmayup i‘tibâr-ı merkūm üzere altmış sehmi mezbûr es-Seyyid Abdülgani Beşe’nin ve altmış sehmi merkūm Ahmed Beşe’nin mâl-ı müşterâları olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 14 L sene [1]238. Şühûdü’l-hâl: Eş-şâhidûne’s-sâbıkūn.