İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 380 Hüküm no: 377 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Hıristo v. Dimitri’nin mâlik olduğu bakkal dükkânının Nevşehirli Mehmed Ağa b. Halil’e satıldığı Ayasofya-i kebîr’de Ömer Efendi dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde Dîvân-ı âlî çavuşlarından işbu bâ‘isü’l-kitâb Nevşehirli Mehmed Ağa b. Halil nâm kimesne mahzarında bi’l-memûriye ikrâr-ı tam ve takrîr-i kelâm edip mahmiye-i İstanbul’da Ayasofya hamamı karşısında vâki‘ zikr olunan kırk yedi bâb dekâkin ve mağazalardan Ömer Efendi dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle müstakıllen mâlik olan Hıristo v. Dimitri nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût ve nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan iki bin yüz altmış beş guruşa mezbûr Mehmed Ağa’ya bi’l-memûriye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm iki bin yüz altmış guruşu bana def‘ ü teslîm eylediğinde ben dahi yedinden bi’l-memûriye ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrun ve cânib-i mîrî ve tüccâr ve esnâfdan kimesnenin alâka ve medhali kalmayup mezbûr Mehmed Ağa’nın mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 B sene [1]238. Şühûdü’l-hâl: Eş-şâhidûne’s-sâbıkūn.