İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 381 Hüküm no: 378 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Kostandi ve Yorgi veledey Ademi’nin nısfiyet üzere mâlik oldukları bakkal dükkânının Seyyid İsmail Ağa b. Ahmed ve Feyzullah Ağa b. Ali’ye satıldığı Mahmudpaşa’da Mengene karşısında bakkāl dükkânı Kezâlik hâzır oldukları hâlde [meclis-i şer‘-i] hatîr-i lâzımü’t-tevkīrde bâ‘isü’l-kitâb kendi nefsinden asıl ve mahmiye-i İstanbul’da Bal Kapanı tüccârından es-Seyyid el-Hâc İsmail Ağa b. es-Seyyid Ahmed tarafından husûs-ı âti’l-beyânı tasdîka vekîl-i şer‘îsi sâbıkā kapan-ı merkūm nâzırı es-Seyyid el-Hâc Feyzullah Ağa b. Ali mahzarında bi’l-memûriye ikrâr-ı tam ve takrîr-i kelâm edip mahmiye-i mezbûrede Mahmudpaşa Câmi‘-i şerîfi kurbünde mengene karşısında vâki‘ kemer dükkânı demekle şehîr zikr olunan kırk yedi bâb dekâkin ve mağazalardan ma‘lûmü’l-hudûd bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye yüz yirmi sehm i‘tibâriyle nısfiyet üzere iştirâken mâlikler olan Kostandi ve Yorgi veledey Ademi nâm zimmîler bundan akdem vukū‘ bulan Rum tâifesi fesâdında medhalleri olduğuna binâen firâr etmeleriyle firârî-i mesfûrânın ber-vech-i muharrer mâlikler oldukları âlât-ı lâzıme-i mezkûre cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin guruşa asıl-ı mezbûr es-Seyyid el-Hâc Feyzullah Ağa ile müvekkil-i merkūm es-Seyyid el-Hâc İsmail Ağa’ya bi’l-memûriye bey‘ ve temlik ve teslîm eylediğimde onlar dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin guruşu bana def‘ ü teslîm eylediklerinde ben dahi bi’l-memûriye yedlerinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup i‘tibâr-ı mezkûr üzere altmış sehmi müvekkil-i mezbûr es-Seyyid el-Hâc İsmail Ağa’nın ve altmış sehmi asıl-ı merkūm es-Seyyid el-Hâc Feyzullah Ağa’nın mâl-ı müşterâları olmuşdur dedikde gıbbe’t-tasdîki’ş-şer‘î [mâ vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.