İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 387 Hüküm no: 385 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firariler Zoteri v. Kanalu ve İstati v. Atam’ın mâlik oldukları yarım hisse bakkal dükkânının Kara Osman Beşe b. Yusuf’a satıldığı Kasımpaşa’da Orta bakkāl Kezâlik hâzır oldukları hâlde meclis-i şer‘-i lâzımü’t-tevkīrde işbu bâ‘isü’l-kitâb Kara Osman Beşe b. Yusuf mahzarında bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da kâin zikr olunan kırk yedi bâb dekâkin ve mağazalardan Orta bakkāl demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm itibariyle otuz sehmi mezbûr Kara Osman Beşe’nin otuz sehmi âharların mâlları olmağla mâ‘adâ otuz sehmden cem‘an altmış sehmine mâlikler olan Zoteri v. Kanalu ve << ve İsda >> İstati v. Atam nâm zimmîler bundan akdem vukū‘ bulan Rum taifesi fesâdında medhalleri olduğuna binâen firâr etmeleriyle zikr olunan gedik ta‘bîr olunur âlât-ı lâzıme-i ma‘lûmeden altmış sehm hisseleri cânib-i mîrîden zabt ve tüccâra nizâmları üzere ber-vech-i muharrer alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere firârî-i mesfûrânın zikr olunan altmış sehm hisselerini tarafeynden [87b] îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin guruşa mezbûr Kara Osman Beşe’ye bi’l-memûriye bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı mezkûr üzere altmış sehmden ber-mûceb-i kāime-i mezkûre firârî-i mesfûrânın ve cânib-i mîrî ve tüccâr ve esnâfdan kimesnenin alâka ve medhali kalmayup i‘tibâr-ı mezkûr üzere otuz sehmi mukaddemâ ve altmış sehmi hâlâ ber-vech-i meşrûh şirâen ki cem‘an doksan sehmi mezbûr Kara Osman Beşe’nin mâlı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene [1]238. Şühûdü’l-hâl: Eş-şâhidûne’s-sâbıkūn. [88a-90b Boş]