İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 386 Hüküm no: 384 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan firari Bakkal Çalık Mihal v. Anton’un mâlik olduğu yarım hisse bakkal dükkânının Mehmed Beşe b. Ali’ye satıldığı Kasımpaşa’da Cum‘apazarında Hacı Abdurrahman dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Beşe b. Ali nâm kimesne mahzarında bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da Cum‘apazarı nâm mahâlde kâin zikr olunan kırk yedi bâb dekâkin ve mağazalardan Hacı Abdurrahman dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmine mâlik olan bakkāl Çalık Mihal v. Anton nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle firârî-i mesfûrânın mâlik olduğu zikr olunan âlât-ı lâzıme-i ma‘lûmeden i‘tibâr-ı merkūm üzere altmış sehm hissesi cânib-i mîrîden zabt ve tüccâra nizâmları üzere alacakları içün terk olundukda bâ-fermân-ı âlî âhara bey‘a memûr olmamla esnâfımızın şurût [ve] nizâmları üzere âlât-ı lâzıme-i merkūmenin i‘tibâr-ı mezkûr üzere firârî-i mesfûrun mâlik olduğu altmış sehm hissesi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan dokuz yüz guruşa mezbûr Mehmed Beşe’ye bi’l-memûriye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dokuz yüz guruşu bana def‘ ü teslîm eylediğinde ben dahi bi’l-memûriye yedinden ahz ü kabz ve tüccâr ve esnâf-ı merkūmûna teslîm eyledim fîmâ-ba‘d âlât-ı lâzıme-i mezkûrede ber-mûceb-i kāime-i merkūme firârî-i mesfûrun ve cânib-i mîrî ve tüccâr ve esnâf-ı merkūmûndan kimesnenin alâka ve medhali kalmayup ber-i‘tibâr-ı merkūm altmış sehm hissesi mezbûr Mehmed Beşe’nin mâl-ı müşterâsı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Ca sene [1]238. Şühûdü’l-hâl: Eş-şâhidûne’s-sâbıkūn.