İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 36 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hâc Ahmed Efendi’nin boşadığı Şerife Rukiye Hanım’dan eşyasını kendi evine naklini istediği Mazbata kaydı Ma‘rûz Husûs-ı âtiyyü’l-beyânın mahallinde ketb ve tahrîri’çün savb-ı şer‘-i enverden bi’l-iltimâs me’zûnen irsâl olan Kâtib es-Seyyid Mehmed Tahir Efendi İstanbul’da Lâleli Çeşme kurbünde Bodrum Câmi‘i civârında Mesîh Paşa-yı Atîk mahallesinde vâkı‘ sâhib-i arzuhâl abacı esnâfından Yakub-zâde el-Hâc Ahmed Efendi b. el-Hâc Mahmûd’un menziline varıp mahalle-i mezbûre imâmı es-Seyyid Hâfız Ali Efendi b. Mustafa ve abacı esnâfının kethüdâsı Mehmed Tahir Efendi b. Abdullah ve Ma‘den kalemi küttâbından es-Seyyid Mehmed Recâî Efendi b. Halil ve sâir cerîdede mazbûtu’l-esâmî müslimîn huzûrlarında ba‘de akdi’l-meclis sâhib-i arzuhâl merkūm el-Hâc Ahmed Efendi tarafından husûs-ı âtiyü’l-beyânda vekîl olduğu Muhâsebe-i evvel kalemi kitâbetinden el-Hâc Hüseyin Efendi b. Mehmed ve Ma‘den kalemi küttâbından Mustafa Fevzi Efendi b. Mehmed nâm kimesneler şehâdetleriyle ber-nehc-i şer‘î [vekâleti] sâbit olan Dîvân-ı hümâyûn kalemi ketebesinden İsmail Efendi b. el-Hâc Halil nâm kimesne meclis-i ma‘kūd-ı mezkûrda müvekkil-i merkūmun zevce-i medhûlün-bihâsı olup zâtı hâzirûn-ı merkūmûn ta‘rîfleriyle mu‘arrefe olan Nûr-i Osmânî Câmi‘-i Şerîfi hatîbi es-Seyyid el-Hâc Mehmed Tahir Efendi kerîmesi Şerife Rukiye Hanım mahzarında mûmâ-ileyhâ Şerife Rukiye Hanım müvekkilim mezbûr el-Hâc Ahmed Efendi’nin beş yüz bir guruş mehr-i müeccel tesmiyesiyle zevce-i medhûlün-bihâsı olup lâkin müvekkilim merkūm el-Hâc Ahmed Efendi işbu târihden beş gün mukaddem İstanbul’da Haseki kurbünde Nevbahar mahallesinde vâkı‘ menzil derûnunda huzûr-ı müslimînde zevcesi mûmâ-ileyhâ Şerife Rukiye Hanım’ı talâk-ı selâse ile tatlîk etmekle işbu akd-i meclis-i şer‘-i âlî olunan menzil derûnunda mevcûde mâlike olduğu eşyâsını mûmâ-ileyhâ Şerife Rukiye Hanım kendi menziline nakl ve tahliye eylemesi müvekkilim merkūmun murâdıdır dedikde ol-dahi müvekkil-i merkūm el-Hâc Ahmed Efendi zevc-i dâhili olduğunu ikrâr ve mâlike olduğu eşyâsından yün memlû beş minder ve Sakız Hatayîsi on dört yastık ve dört koltuk yastığı ve iki yüz yastığı ve üç şilte ve üç Hatayî mak‘ad ve iki erkân minderi ve Selanikkârî bir Edirne keçesi ve iki kapı perdesi ve on bir elvân yorgan ma‘a çârşeb ve bir sagīr yorgan ve def‘a beş yüz yastığı ve beş baş yastığı ve iki basma döşek ve iki basma şilte ve bir tüysüz beyaz ihrâm ve bir kırmızı şilte ve biri yollu ve biri Selîmiye ve biri Hind sevâyisi ve biri gezi ve biri yazma basma ve biri oyalı ve ikisi tülbent cem‘an sekiz entari ve biri boy biri nîm iki samur kürk biri boy biri nîm iki kakum kürk ve bir nîm elma kürk ve bir fermâyiş? şal ve bir bohça şal ve altı makrame ve iki havlu ve bir Mardinî işleme peşkir ve bir işleme sofra ve bir tennûr ve bir mangal tahtası ve bir sadefkârî iskemle ve bir sedefkârî pîş-tahta ve bir cild Birgivî Şerhi ve bir kıt‘a Mushaf-ı Şerîf ve bir sedefkârî farâş ve bir ağaç beşik ve bir dest-gâh ve iki sagīr döşek ve iki şilte ve beş sagīr yorgan ve iki kat köhne elbise ve iki sagīr kavuk ma‘a yeşil sarık ve yeşil kehirbâ imâmeli duhân çubuğu ve bir tombak şamdan ve bir sîm âyine ve bir sedefkârî çekmece ve bir ceviz çekmece ve bir mâ’î ihrâm ve on sahan ma‘a kapak ve bir lenger ve bir çorba tası ve bir bakraç [2a] ve iki güğüm ve biri şerbet biri kebîr iki güğüm ve altı tencere ma‘a kapak ve bir leğen ma‘a ibrik ve bir abdest leğeni ve bir mangal ve iki tepsi ve iki kadayıf tepsisi ve iki sagīr sini ve bir tombak sini ve bir kebîr tâbe ve iki hamam tası ve iki kahve ibriği ma‘a tepsi ve dört sagīr sahan ve iki sagīr tas ve dört kepçe ve iki kevgir ve sâir hırdavât eşyâsını vekîl-i merkūm İsmail Efendi mûmâ-ileyhâ Şerife Rukiye Hanım’a def‘ ve teslîm ol-dahi ahz ve kabz ve menzil-i merkūmdan ihrâc edip ancak vekîl-i merkūm İsmail Efendi müvekkil-i merkūmun malından mûmâ-ileyhâ Şerife Rukiye Hanım’a mukaddemâ li-ecli’l-isti‘mâl i‘âre ve teslîm eylediği bir marbiç şalı bana aynen teslîme mûmâ-ileyhâ Şerife Rukiye Hanım’a tenbîh olunmak bi’l-vekâle matlûbumdur deyu iddi‘â ol-dahi cevâbında zikr olunan marbiç şalı müvekkil-i merkūm hacc-ı şerîfden geldikden sonra bana hîbe ve teslîm ben-dahi ittihâb ve kabz etmişdim deyip mehr-i müeccel-i mezkûrun mikdârında dahi ihtilâf etmeleriyle husûs-ı mezkûrları üç gün mürûrunda meclis-i şer‘a gelip müterâfi‘ân olmak üzere tevkīf-i da‘vâ eylediklerini kâtib-i merkūm dâ‘îleri ma‘an meb‘ûs ümenâ-i şer‘den çukadâr İbrahim Ağa b. Hasan ve Muhzır Halil Çelebi ile meclis-i şer‘a inhâ etmekle ol-vechile henüz da‘vâlarına faysal verilmediği beş gün mukaddem târîhiyle cerîdede mazbût ve mukayyed bulunmağın imtisâlen li’l-emri’l-âlî da‘vâlarının sûret-i zabtı İstanbul Mahkemesi’nde huzûr. Fî 16 L sene [1]241