İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 37 Hüküm no: 3 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavit v. Rafael’in kazzaz gediğini, İsak v. Matatya’ya devrettiği Kazzâz gediği mübâya‘ası ve ismine kaydı Ma‘rûz Kazzâz esnâfından Tavit v. Rafail nâm yahudi meclis-i şer‘-i münîrde yine esnâf-ı merkūmeden İsak v. Matatya mahzarında takrîr-i kelâm edip yedimde olan sûret mantûkunca İstanbul’da Çarşı-yı Kebîr’de tulumbacıyân sûkunda Sarrâf köşesinde Vezneciler’e müntehî oluncaya değin vâkı‘ baş muhâsebede mukayyed bir bâb kazzâz dükkânı derûnunda mevcûde beyne’l-esnâf gedik ta‘bîr olunur yedimde müstakillen malım olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safka-i vâhide mersûm İsak yahudiye beş-bin üç yüz guruş semen-i makbûza bey‘ ve temlîk ve teslîm eylediğimde ol-dahi ber-minvâl-i muharrer yedimden iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî sahîhan ibrâ ve ıskāt eyledik ba‘de’l-yevm gedik-i mezkûrda benim alâkam kalmayıp müşterî-i mersûmun mülk-i müşterâsı olmuşdur deyu ba‘de-l-ikrâr ve’t-tasdîk gedik-i mezkûrun mersûm Tavit ismine olan kaydı ref‘ ve terkīn ve kendi ismine tashîhan kayd ile yedine bir kıt‘a sûret i‘tâsı bâbında istid‘â-yı inâyet eylediği İstanbul Mahkemesi’nden huzûr. Fî 17 L sene [1]241