İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: Hüküm no: 8 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Ali Hanı’nda, kiracı olduğu odayı kilitleyip ortadan kaybolan Kakmacı Nikogos’un, odasının kilidinin açıldığı İmâm Ali Hânı’nda oda küşâdı Ma‘rûz Nezâret-i dâ‘îlerinde olan evkāfdan sâhibât-ı hayrâtdan merhûme Nâzikî Hatun vakfı müsakkafâtından İstanbul’da Çarşı-yı Kebîr’de İyneyeciler kurbünde İmâm Ali Hânı derûnunda tabaka-i süflâda çalgıcı kemânî Apostol ve tarakçı Asador zimmîler odaları beynlerinde kâin bir bâb odada müşâhereten müste’cir olarak mütemekkin olan kakmacı Nikogos zimmî bundan akdem oda-i mezkûru mukaffelen terk ve ta‘tîl-birle diyâr-ı âhara firâr ve gaybet-i münkatı‘a ile gāib ve mefkūd olmağla oda-i mezkûrun kuflü ma‘rifet-i şer‘le feth ve küşâd ve derûnunda gāib-i mersûmun zuhûr eden eşyâsı tahrîr ve gāib-i mesfûrun hâli mütebeyyin oluncaya değin yed-i emîne vaz‘ ve oda-i mezkûr kendüye teslîm olunmasını hâmiş-i arzuhâlde mastûr derkenâr nâtık olduğu üzere oda-i mezkûrun bâ-temessük-i mütevellî bi’l-icâreteyn müstakilleten mutasarrıfesi Terazine bt. Bedros nasrâniye işbu arzuhâliyle istid‘â etmekle ol-bâbda sâdır olan fermân-ı âlîlerine imtisâlen savb-ı şer‘-i enverden irsâl olunan Kâtib es-Seyyid Ahmed Rıza Efendi dâ‘îleri ma‘an meb‘ûs ümenâ-i şer‘le hân-ı mezkûr derûnuna varıp vakf-ı [mez]kûrun kāimmakām-ı mütevellîsi ve nâzırı olan Mehmed Esad Efendi b. Hâfız Mehmed nâm kimesne ile oda-i mezkûrun mutasarrıfesi mesfûre Terazine nasrâniye tarafından vekâleti Aznavur oğlu Andon v. Serovpe ve bezzâz Mikail v. Andon zimmîler haberleriyle zâhir olan sarrâf Mikail v. Keroba zimmî ve sâirler hâzır oldukları hâlde oda-i mezkûrun kuflünü feth ve küşâd ve derûnunda gāib-i mersûmun zuhûr eden eşyâsını tahrîr bi-a‘yânihâ gāib-i mesfûrun hâli mütebeyyin oluncaya değin mu‘temed ve müstakīm idüğü hâzırûn-i merkūmûn ihbârlarıyla mütehakkik olup kıbel-i şer‘den kayyum nasb olunan hân-ı mezkûr odabaşısı [3b] Ohannes v. Vartan zimmî yedine li-ecli’l-hıfz bâ-defter-i müfredât îdâ‘ ve oda-i mezkûr vekîl-i mersûm Mikail zimmîye teslîm olunduğu İstanbul Mahkemesi’nden huzûr. Fî 23 L sene [1]241