İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 40 Hüküm no: 7 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Mustafa’nın Sultan odalarında bulunan iki oda gediğini Hüseyin Beşe b. Hasan’a devrettiği Sultan odalarında oda gediği mübâya‘ası Ma‘rûz İstanbul’da Mahmud Paşa Câmi‘-i Şerîfi kurbünde vâkı‘ merhûm Rüstem Paşa evkāfı müsakkafâtından Sultan Odaları demekle ma‘rûf bir bâb hânın fevkānîsinde sol tarafda sekizinci bir bâb ve on dördüncü bir bâb ki cem‘an iki bâb odalar derûnlarında mevcûde gedik ta‘bîr olunur âlât-ı lâzıme-i ma‘lûmelere bâ-sûret şirâ’en mâlik olan Hasan Ağa b. Mustafa meclis-i şer‘-i münîrde Hüseyin Beşe b. Hasan muvâcehesinde takrîr-i kelâm edip ber-vech-i muharrer mâlik olduğum âlât-ı gedik-i mezkûrları tarafeynden bi’l-îcâb ve’l-kabûl bâtten ve sahîhan bi-safka-i vâhide bin beş yüz guruş semen-i makbûza merkūm Hüseyin Beşe’ye bey‘ ve temlîk ve teslîm ol-dahi ber-vech-i iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allıka da‘vâdan her birimiz âharın zimmetini kabûlü hâvî ibrâ ve ıskāt etmemizle fî-mâ ba‘d âlât-ı gedik-i mezkûrlar merkūm Hüseyin Beşe’nin mülk-i müşterâsı ve hakk-ı sarfı olup benim kat‘an alâkam kalmamışdır deyu ba‘de’l-ikrâr ve’t-tasdîk gedik-i mezkûrların kayd-ı atîki mezbûr Hasan Ağa’nın üzerinden ref‘ ve terkīn ve yedinde olan atîk sûreti dahi ahz kaleminde battâlda hıfz olunarak müşterî-i merkūm Hüseyin Beşe ismine tashîhan kayd ile kaleminden yedine müceddeden bir kıt‘a sûret i‘tâ buyurulmasını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 22 Şevval sene 1241