İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 42 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Beypazarı voyvodası es-Seyyid Mustafa Ağa b. Ali’nin, kaza voyvodası es-Seyyid Mehmed Ağa b. Ali’den alacağı olduğu iddiası 50 kile şaîr ve 350 aded Adlî altının men‘i Mültezim tâifesinden es-Seyyid Mustafa Ağa b. Ali şifâhen sâdır olan fermân-ı âlîlerine imtisâlen Çarşamba günü Arz Odası’nda huzûr-ı hazret-i sadâret-penahîlerinde ma‘kūd meclis-i şer‘-i münîrde yine tâife-i merkūmeden es-Seyyid Mehmed Ağa b. Ali muvâcehesinde ben bin iki-yüz otuz sekiz senesi hılâlinde Anadolu’da Beypazarı kazâsında voyvoda olup merkūm dahi iki-yüz otuz dokuz senesine mahsûben kazâ-i mezbûr voyvodalığını iltizâm ile kazâ-i mezbûra geldiğinde ben malımdan mezbûra bey‘ ve teslîm ol-dahi iştirâ ve kabz eylediği beher keyli on ikişer guruşa olarak elli keyl şaîr semeninden altı-yüz guruş ve kezâlik malımdan merkūma bey‘ ve teslîm eylediğim mikdâr ve fiy’âtı beynimizde ma‘lûm nühâs semeninden dahi üç-yüz seksen guruş ki cem‘an mezbûrun zimmetinde alacağım olan dokuz yüz seksen sekiz guruş ile yine kazâ-i mezbûrda malımdan ve yedimden iktirâz ve kabz ve istihlâk eylediği dört bin iki yüz guruşa mu‘âdil üç yüz elli aded Adlî altınların misillerini merkūm es-Seyyid Mehmed Ağa’dan taleb eder[im] deyu da‘vâ ettikde ol-dahi cevâbında ancak zikr olunan nühâsı müdde‘î-i merkūmdan iki-yüz seksen guruşa iştirâ ve semenini târih-i mezkûrda kendüye tamâmen edâ ve teslîm edip hattâ semen-i mezkûru kabzını müş‘ir işbu memhûr tahvîli yedime i‘tâ etmiş-idi deyip mâ‘adâ zikr olunan elli keyl şaîri iştirâsını ve mârru’l-beyân üç-yüz elli aded Adlî altınları iktirâz ve kabzını inkâr ve müdde‘î-i merkūm mârru’z-zikr nühâsı iki-yüz seksen guruşa bey‘ ve semenini kabz ve istîfâ eylediğini ikrâr ve tasdîk ve mâ‘adâ ber-vech-i muharrer elli keyl şaîri bey‘ini ve üç-yüz elli aded Adlî altınları iktirâz ve teslîm müdde‘âlarına ikāmet-i beyyine edemeyip bi’t-taleb merkūm es-Seyyid Mehmed Ağa bi’l-müvâcehe ber-nehc-i şer‘î tahlîf olunmağın mûcebince müdde‘î-i merkūm es-Seyyid Mustafa Ağa da‘vâ-yı mezkûresiyle merkūm es-Seyyid Mehmed Ağa’ya bî-vech-i şer‘î ve bilâ-beyyine mu‘ârazadan ba‘de’l-men‘ merkūm es-Seyyid Mustafa Ağa meclis-i ma‘kūd- ı mezkûrda mezbûr es-Seyyid Mehmed Ağa mahzarında i‘âde-i kelâm edip benim merkūm es-Seyyid Mehmed Ağa zimmetinde hakīkatde zikr olunan üç-yüz elli aded altın iktirâz ile alacağım olmayıp ancak benim voyvodalığım hengâmında kazâ-i merkūm re‘âyâsından bana âid olacak a‘şâr-ı şer‘iyye ve rüsûmât-ı sâireden olarak merkūm es-Seyyid Mehmed Ağa ma‘lûmu’l-esâmî mahsûrü’l-eşhâs kimesnelerden dört bin iki-yüz guruş ahz etmekle mücerred merkūmun ahz eylediği meblağ-ı mezkûr dört bin iki-yüz guruş [4a] voyvodalığım hengâm[ın]da bana âid olacak a‘şâr-ı şer‘iyye ve rüsûm-ı sâireden olduğuna binâen meblağ-ı mezkûr dört bin iki-yüz guruşu bana malından vermek üzere merkūm es-Seyyid Mehmed Ağa’ya cebr olunsun deyu takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle tekrâr merkūm es-Seyyid Mehmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 17 L sene [1]241