İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 43 Hüküm no: 11 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kantar Emini Mustafa Ağa b. Süleyman’ın, Trabzonlu Cömertoğlu Mustafa Ağa b. Ali’den aldığı cariyenin kusurlu olduğunu iddia ettiği Câriye semeninden bâkī 1450 guruşu müeccelen edâya ta‘ahhüd Ma‘rûz Hâssa hasekilerinden hâlâ Kantâr Emîni Emin Ağacı Ağa demekle ma‘rûf Mustafa Ağa b. Süleyman nâm kimesne meclis-i şer‘-i münîrde üserâ celebânından Trabzonî Cömerdoğlu Mustafa Ağa b. Ali muvâcehesinde esîr dellâlı Kabartalı Hüseyin Ağa b. Ömer hâzır olduğu hâlde ben işbu sene-i mübâreke Şa‘bânü’l-mu‘azzamanın yirmi üçüncü cum‘a günü cemî‘-i uyûbdan sâlime olmak üzere merkūm Mustafa Ağa’nın malından hâzır-ı merkūm vesâtatıyla üç-bin iki-yüz elli guruş semen-i medfû‘ ve makbûza iştirâ ve kabz eylediğim işbu ser-sâm ta‘bîr olunur verem-fi’d-dimâğ illeti ve illet-i mezkûreden mütevellid burnunun içinde dimâğına karîb mahalde âkile illeti dahi olup ol-vechile mu‘ayyeb ve ayb-ı merkūm câriye-i hâzıra-i mezbûrede şirâ târihinden kadîm ve inde’t-tüccâr noksân-ı semen îcâb eder uyûbdan olmağla redd-i semen ve kabz-ı mebî‘ olunmak matlûbumdur deyu dellâl-ı hâzır-ı mezbûrun tasdîkiyle teveccüh-i husûmet bulundukdan sonra da‘vâ ettikde ol-dahi cevâbında câriye-i hâzıra-i mezbûreyi ol-mikdâr guruş semen-i makbûza müdde‘î-i merkūma bey‘ini ikrâr ayb-ı mezkûrun kıdemini inkâr ettikde müdde‘î-i mezbûr ayb-ı mezkûr câriye-i hâzıra-i merkūmede şirâ târihinden kadîm olduğu etıbbâ-i hâssadan ehl-i hıbre ta‘yîn olunan es-Seyyid Mustafa Efendi b. es-Seyyid Mehmed ve es-Seyyid Mehmed Emin Efendi b. es-Seyyid Mehmed şehâdetleriyle bi’l-müvâcehe vech-i şer‘î üzere ba‘de’l-isbât câriye-i hâzıra-i merkūmenin ayb-ı mezkûruna muttali‘ oldukdan sonra kendüden kavlen ve fi‘ilen kabûle delâlet eder nesne sâdır olmadığına müdde‘î-i mezbûr Mustafa Ağa ber-nehc-i şer‘î tahlîf olunmağın mûcebince câriye-i hâzıra-i merkūmeyi geri ahz-birle semen olarak makbûzu olan meblağ-ı mezkûr üç-bin iki-yüz elli guruşu müdde‘î-i merkūma red ve teslîme merkūm Cömerdoğlu Mustafa Ağa’ya ba‘de’l-hükm ve’t-tenbîh merkūm Cömerdoğlu Mustafa Ağa câriyye-i hâzıra-i mezbûreyi kabz edip meblağ-ı mahkûm-bih mezkûr üç-bin iki-yüz elli guruşun bin sekiz yüz guruşunu dahi müdde‘î-i merkūm Mustafa Ağa’ya meclis-i şer‘de edâ ve teslîm ol-dahi ba‘de’l-ahz bâkīsi olan bin dört-yüz elli guruşu târih-i i‘lâmdan otuz bir gün tamâmına değin tamâmen kendüye edâ ve îfâ etmek üzere mezbûr Cömerdoğlu Mustafa Ağa’yı bi’r-rızâ kabûlü hâvî te’cîl ve meblağ-ı bâkī-i mezkûr bin dört-yüz elli guruşa merkūm Cömerdoğlu Mustafa Ağa’nın emriyle hâzır bi’l-meclis Kapan-ı dakīk tüccârınden Rizeli es-Seyyid Mehmed Yazıcı b. es-Seyyid Ali kefâlet-i mutlaka-i sahîha-i şer‘iyye ile kefîl ve zâmin olduğunda müdde‘î-i merkūm Mustafa Ağa dahi kefâlet-i mezkûreyi kabûl eylediği İstanbul Mahkemesi’nden huzûr. Fî 3 L sene [1]241