İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 57 Hüküm no: 21 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Destârî Ömer Ağa’nın yanmış han arsasındaki kasap dükkânı gediğinin başka bir yere nakledildiği Kasab dükkânı keşf ve nakli Ma‘rûz Sâdır olan fermân-ı âlîlerine imtisâlen taraf-ı dâ‘iyânemden irsâl olunan Kâtib Mehmed Tahir Efendi bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan bâ-pâye-i Mekke-i Mükerreme fazîletlü Abdülkādir Beyefendi tarafından meb‘ûs Kâtib Mehmed Nizâmeddîn Efendi hassa-i mi‘mârî hulefâsından İsmail Kemâlî ve Ali Necîb halîfeler ile Dârussaâdetü’ş-Şerîfe Ağası hazretleri nezâret-i aliyyelerinde âsûde evkāfdan Câmi‘-i Şerîf-i Ayasofya-i Kebîr vakfından İstanbul’da Kırkdört kapısı kurbünde Balaban Ağa Mahallesi’nde Şehâbeddîn Mektebi karşısında köşe başında vâkı‘ Doğramacı Agop zimmî ile Kafesçi Mehmed Beşe dükkânları beynlerinde kâin bir bâb muhterik hân arsasına varıp cerîdede mazbûtu’l-esâmî olan müslimîn huzûrlarında akd-i meclis-i şer‘-i âlî eylediklerinde kasab esnâfından sâhib-i arzuhâl Hâfız İbrahim b. Halil nezâret-i hazret-i [9a] müşârun-ileyhde âsûde evkāftan hudâvendigâr-ı esbak cennet-mekân-ı firdevs-âşiyân merhûm ve mağfiret-nişân Sultân Abdülhamîd Hân tâbe serâhu hazretleri evkāf-ı şerîfeleri mütevellîsi e‘âzım-ı ricâl-i Devlet-i aliyyeden hâlâ Darbhâne-i Âmire nâzırı sa‘âdetlü es-Seyyid Mehmed Esad Efendi tarafından mürsel câbî-i vakf el-Hâc Hâfız Ömer Efendi ve kethüdâ-yı kassâbân el-Hâc Hasan Ağa ibn el-Hâc Osman hâzır oldukları hâlde meclis-i ma‘kûd-ı mezkûrda arsa-i mahdûde-i mezkûrenin bâ-temessük-i mütevellî bi’l-icâreteyn müstekıllen mutasarrıfı derûn-ı arzuhâlde mastûru’l-ism Destârî Ömer Ağa b. İsmail muvâcehesinde mahalle-i mezbûre imâmı Hâfız Hamdullah Efendi b. Mehmed ve mekteb-i mezkûr hocası Hâfız İsmail Efendi ile mahalle-i mezbûre ahâlîsinden Kalaycı Memiş Ağa b. Ali ve Ömer Ağa b. İbrahim ve sâirleri hâzır oldukları hâlde vakf-ı müşârun-ileyh müstağıllâtından Yedikulle hâricinde vâkı‘ gayr-ı-ez selhhâne mîrî on aded ganem selhhânelerinden altıncı selhhâneye merbût kasab dükkânları gediklerinden bâ-temessük-i mütevellî-i vakf müstakillen mutasarrıf olduğu bir aded kasab dükkânı gediği bundan akdem mahalle-i mezbûrede vâkı‘ Çukurçeşme karşısında ekmekçi fırını ile berber dükkânı beynlerinde vâkı‘ merkūm Ömer Ağa’nın bâ-temessük-i mütevellî mutasarrıf olduğu bir bâb kasab dükkânı derûnunda mevcûde ve mu‘teber ve merbûta olduğu selhhânede hisse-i tevzî‘i verilip icâresi dahi cânib-i vakf-ı müşârun-ileyhe verile-gelmiş iken dükkân-ı mezkûr iki yüz yirmi üç senesi hilâlînde ol-havâlîde vukû‘ bulan harîkde muhterik oldukdan sonra merkūm Ömer Ağa gedik-i mezkûru mahall-i âhara nakl etmeksizin arsasına el-yevm mevcûd olan bir bâb berber dükkânını binâ ve inşâ-birle ol-vechile gedik-i mezkûr mu‘attal kalıp lâkin gedik-i mezkûrun ta‘tîli cânib-i vakf-ı müşârun-ileyhe muzır olduğundan gedik-i mezkûru bu esnâda merkūm Ömer Ağa’nın izniyle ber-vech-i muharrer mutasarrıf olduğu arsanın bi’l-ifrâz köşe mahallinde tûlen dokuz zirâ‘ ve arzen beş zirâ‘ on sekiz parmak terbî‘an kırk sekiz zirâ‘ mahal üzerine teberru‘an li’l-vakf binâ ve inşâ ve merkūm Ömer Ağa dahi istîcâr edeceğim bir bâb dükkâna nakletmek murâdıyla zikr olunan kırk sekiz zirâ‘ mahalle dükkân-ı mezkûru inşâya şürû‘ edip ancak mekteb-i mezkûr tarafında tarîk-i âm kaldırımından olarak tûlen beş zirâ‘ on sekiz parmak ve arzen on yedi parmak mahalli arsa-i mezkûrdan olmak zu‘muyla ilâve eylediğime binâen ahâlî-i hâzirûn-ı mezbûrûn ber-vech-i muharrer dükkân-ı mezkûru inşâma mümâna‘at etmişlerdir. el-Hâletü hâzihî zikr olunan ve ilâve olunan mahal arsa-i mezkûreden olmayıp tarîk-i âm kaldırımından olduğu mezbûr Ömer Ağa’nın ikrâr ve ihbârıyla ma‘lûmum oldukda ben-dahi mârru’z-zikr ilâve olunan mahalli kaddi üzere tarîk-i âma terk ile zikr olunan kırk sekiz zirâ‘ köşe mahalline altı zirâ‘ kaddinde mekteb-i mezkûr tarafına kat‘an pencere küşâd olunmayarak fevkinde odayı müştemil bir bâb kasab dükkânı binâ ve inşâ ve gedik-i mezkûrumu nakle müte‘ahhid oldum deyu mukırr-ı mezbûru merkūm Ömer Ağa ile ahâlî-i hâzirûn-ı mezbûrûn tasdîk ettiklerini kâtibân-ı merkūmân dâ‘îleri mahallinde lede’l-mu‘âyene ve’t-tahrîr ma‘an meb‘ûs ümenâ-i şer‘le meclis-i şer‘a gelip tarafeyn ve hâzirûn-ı merkūmûn muvâcehelerinde alâ-vukū‘ihi ba‘de’l-inhâ ve’t-tesâduk merkūm Ömer Ağa dükkân-ı mezkûru binâ etmek için malından sekiz yüz guruş merkūm Hâfız İbrahim’e meclis-i şer‘de def‘ ve teslîm ve dükkân-ı mezkûr binâsına sarfa emr eylediğinde ol-dahi ahz ve kabz ve meblağ-ı merkūm ile kendi malından sarf ederek teberru‘an li’l-vakf binâ ve inşâ ve gedik-i mezkûru derûnuna nakl ile beher şehr yedişer guruşa merkūm Ömer Ağa’dan istîcâr edip ziyâde masrûfunu taleb etmemeğe müte‘ahhid olduğundan merkūm Ömer Ağa dahi gedik-i mezkûru minvâl-i muharrer üzere inşâ olunacak dükkân derûnuna nakle râzı olup dükkân-ı mezkûru dahi ba‘de’l-binâ ol-mikdâr îcâra ba‘de’t-ta‘ahhüd gedik-i mezkûr binâ ve inşâ olunacak dükkân-ı sânî-i mezkûra nakli ve kayd-ı evveli defter-i vakf-ı müşârun-ileyhden [9b] ref‘ ve terkīn ve mahall-i sânî-i mezkûra nakl ile nakl ve tahvîli müş‘ir taraf-ı vakf-ı müşârun-ileyhden müceddeden yedine temessük i‘tâ olunmasını istid‘â ve bu makūle kasab gediği nakli esnâf-ı merkūmenin şurût-ı nizâmlarından olup mesbûku’l-emsâl idüğünü kassâbân kethüdâsı hâzır-ı merkūm el-Hâc Hasan Ağa ve el-Hâc İbrahim Ağa ve el-Hâc Hasan Ağa ve Mercanlı Ali Ağa nâm kimesneler dahi haber vermeleriyle şurûtu mûcebince merkūm Hâfız İbrahim’in istid‘âsı üzere gedik-i merkūm inşâ olunacak dükkân-ı sânî-i merkūme nakl ile taraf-ı vakfdan müceddeden yedine bir kıt‘a temessük i‘tâ olunmak iktizâ eylediği İstanbul Mahkemesi’nden huzûr. Nüshateyn Fî 19 L sene [1]241