İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 56 Hüküm no: 20 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayseri eşrafından Zennecizâde es-Seyyid Ali Ağa’nın, halasının kızı Fatma Hanım’dan alacağı olduğu 2400 guruşa sulh Ma‘rûz Medîne-i Kayseriye vücûhundan Âsitane-i aliyyede mukīm Zennecizâde es-Seyyid Ali Ağa b. es-Seyyid Mustafa tarafından husûs-ı âtîde vekîl olduğu Mehmed Şâkir Ağa b. Halil ve Mehmed Reşid Ağa b. İbrahim Edhem nâm kimesneler şehâdetleriyle ber-nehc-i şer‘î [vekâleti] sâbit olan Musa Ağa b. İbrahim meclis-i şer‘-i münîrde Oturakçı es-Seyyid Mehmed Şerif Ağa b. es-Seyyid el-Hâc Hasan muvâcehesinde müvekkilim mezbûr es-Seyyid Ali Ağa’nın halası kızı olup İstanbul’da Horhor Çeşmesi kurbünde sâkine iken bundan akdem vefât eden merhûm Mar‘aşî Ali Paşa halîlesi Fâtıma Hanım ibnetü’l-müteveffâ Fethullah zimmetinde cihet-i karzdan yedi bin guruş hakkı anın-dahi mu‘takası zevc-i merkūm es-Seyyid Mehmed Şerif Ağa zimmetinde cihet-i deyn-i şer‘îden dört bin guruş alacağı olmağla mezbûre Fâtıma Hanım işbu bin iki yüz kırk bir senesi Muharremi’nin on dokuzuncu günü hayâtında deyni olan meblağ-ı mezkûr yedi bin guruşun dört bin guruşuyla müvekillim mezbûr es-Seyyid Ali Ağa’yı ol-mikdâr medyûnu mezbûr es-Seyyid Mehmed Şerif Ağa üzerine şerâ’iti üzere cümlesi bir meclisde hâzır oldukları halde havâle-i mukayyede ile havâle ve her biri havâle-i mezkûreyi kabul etmeleriyle ol-vechile deyn-i mezkûrun dört bin guruşundan muhîl-i mezbûre Fâtıma Hanım’ın zimmeti ber’iye olup muhâlün-aleyh merkūm es-Seyyid Mehmed Şerif Ağa zimmetine nakl etmeğin suâl olunup meblağ-ı muhâlün-bih mezkûr dört bin guruşu müvekkilim muhâlün-leh mezbûr es-Seyyid Ali Ağa için bi’l-vekâle muhâlün-aleyh merkūm es-Seyyid Mehmed Şerif Ağa’dan taleb ederim deyu da‘vâ eylediğimde ol-dahi cevâbında kaziyye minvâl-i muharrer üzere olduğunu ikrâr ve i‘tirâf edip lâkin ben cihet-i havâle-i mezkûreden deynim olan meblağ-ı merkūm dört bin guruşu sene-i mezkûre Şa‘bânı’nın on beşinci günü İstanbul’da Aksaray Çarşısı’nda Mustafa Ağa Kahvesi’nde mecmû‘u ufak para olarak müdde‘î-i müvekkil-i merkūm es-Seyyid Ali Ağa’ya tamâmen edâ ve teslîm etmiş idim deyu inkâra mukārin eylediği def‘ini beyâna ba‘de’l-havâle muslihîn tavassutuyla beynimiz ıslâh olunup ben ber-vech-i muharrer tasaddî eylediğim da‘vâ-yı mezkûreden müvekkilim mezbûra izâfetle bi’t-tav‘ ve’r-rızâ merkūm es-Seyyid Mehmed Şerif Ağa ile iki bin dört yüz guruş üzerine bi’l-vekâle sulh olduğumda ol-dahi sulh-i mezkûru kabûl ve bedel-i sulh-ı merkūm iki bin dört yüz guruşu tamâmen ve kâmilen bana def‘ ve teslîm ben-dahi yedinden bi’l-vekâle ahz ve kabz edip ziyâdesi olan bin altı yüz guruşa ve bi’l-cümle husûs-ı mezkûra ve sâir cemî‘-i hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve ıskāt ve her birimiz ber-vech-i muharrer âharın ibrâsını asâleten ve vekâleten kabûl eyledik deyu mukırr-ı vekîl-i merkūm Musa Ağa’nın bi’l-vekâle eylediği cemî‘-i takrîr-i meşrûhunu mezbûr es-Seyyid Mehmed Şerif Ağa tasdîk ve bu vechile külliyen kat‘-ı nizâ‘ eyledikleri İstanbul Mahkmesi’nden huzûr. Nüshateyn Fî 27 L sene [1]241