İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 59 Hüküm no: 23 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî Mehmed Edhem b. Abdullah’ın, ihtidasından evvel Aleniko adlı kadına borç verdiği iddiası 1500 guruş men‘ Ma‘rûz Mübârek rikâb-ı kamer-tâb-ı mülûkâneye takdîm olunan işbu arzuhâlde mezkûrü’l-ism mühtedî Mehmed Edhem b. Abdullah Çarşamba günü Arz odasında huzûr-ı hazret-i sadâret-penâhîlerinde ve ba‘dehû bi’t-terâzî dâ‘îhânelerinde ma‘kūd meclis-i şer‘-i münîrde İstanbul’da Cebe Ali Kapısı hâricinde mütemekkine Hekîm Yani zevcesi sâhibe-i arzuhâl mu‘arrefetü’ş-şahs Aleniko bt. Dimitri nasrâniye muvâcehesinde ben kable’l-ihtidâ Rum patrikhânesinde mukīm olmam takrîbiyle bin iki yüz otuz sekiz senesi Şa‘bânı’nın on sekizinci günü mersûme Aleniko nasrâniye malımdan ve yedimden karz aldığı bâ-temessük bin sekiz yüz guruşun üç yüz guruşunu bundan akdem bana edâ ve teslîm etmekle bâkīsi olan bin beş yüz guruş el-yevm zimmetinde hakkım olup hatta meblağ-ı bâkī-i mezkûr bin beş yüz guruş cihet-i mezkûreden zimmetinde bana deyni olduğunu ikrâr dahi etmiş olmağla meblağ-ı bâkī-i mezkûru nasrâniye-i mesfûreden hâlâ taleb ederim deyu da‘vâ ettikde ol-dahi külliyen inkâr etmekle müdde‘î-i mezbûr ber-vech-i muharrer müdde‘âsını isbâtdan izhâr-ı acz edip talebiyle mesfûre Aleniko nasrâniyeye bi’l-müvâcehe vech-i şer‘î üzere yemîn verilmeğin mûcebince müdde‘î-i mezbûr Mehmed Edhem da‘vâ-yı mezkûresiyle mesfûre Aleniko nasrâniyeye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî Gurre-i Za sene [1]241