İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 60 Hüküm no: 24 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mehmed Emin Ağa, es-Seyyid Halil Ağa ve anneleri Şerife Fâtıma Hatun’un nalband dükkânlarında kiracı İbrahim Usta’nın az kira verdiğini iddia ettikleri Nalband dükkânı îcârı Ma‘rûz Ashâb-ı arzuhâl zikri [zikr-i] âtî dükkânın rub‘una mutasarrıf es-Seyyid Mehmed Emin Ağa b. Hüseyin ve rub‘-ı âharına mutasarrıf li-ebeveyn er karındaşı es-Seyyid Halil Ağa ile nısfına mutasarrıfe vâlideleri mu‘arrefetü’z-zât Şerife Fâtıma bt. es-Seyyid Mustafa nâm hatun her biri meclis-i şer‘-i münîrde Âsitâne-i aliyyede vâkı‘ nalband esnâfından derûn-ı arzuhâlde mezkûrü’l-ism İbrahim Usta b. Mehmed muvâcehesinde esnâf-ı merkūme kethüdâsı İsmail Ağa ve yiğitbaşısı Mehmed Usta ve ihtiyârlarından Ahmed Usta ve Ali Usta ve Hasan Usta ve sâirleri hâzır oldukları hâlde mezbûr İbrahim Usta İstanbul’da Aksaray çarşısında Arabacılar içinde menzilimiz tahtında kâin ber-vech-i meşrûh mutasarrıf olduğumuz bir bâb nalband dükkânında müste’cirimiz olup lâkin ecr-i mislinden noksân kirâ teklîfiyle gadr dâ‘iyesinde olduğundan biz dahi fesh-i akd-i icâre ile ihrâcına tasaddî etmiş-idik el-hâletü hâzihî beynimiz ıslâh ve te’lîf olunup dükkân-ı mezkûrun ecr-i misli [10a] idüğü esnâf-ı hâzirûn-ı merkūmûnun haberleriyle zâhir olan beher şehr onar guruş kirâ kavliyle işbu sene-i mübâreke Zilka‘detü’ş-şerîfe gurresinden i‘tibâr ile aded-i şühûr ve sinîn beyân olunmaksızın ben mezbûr İbrahim Usta’ya müceddeden îcâr ve teslîm eylediğimizde ol-dahi ber-vech-i muharrer istîcâr ve kabûl etmekle fî-mâ ba‘d biz kirâ artırmak ve bahâne-i sâire ile mezbûrun ihrâcına tasaddî etmemeğe ol-dahi kirâ-yı mezkûru mâh-be-mâh cevr ü ezâ etmeksizin bize edâ ve teslîme tarafeynden her birimiz ta‘ahhüd eyledik deyu mukırrûn-ı mezbûrûnun cemî‘-i takrîr-i meşrûhlarını mezbûr İbrahim Usta tasdîk ve bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî Selh-i L sene [1]241