İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 71 Hüküm no: 33 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzunçarşı Tomruk Sokak mahallesinde ikamet eden el-Hâc Hasan Ağa ile hanımı Şerife Fâtıma bt. Mehmed’in, mahallelinin şikâyeti ile mahalleden çıkarıldıkları Mahalleden ihrâc Ma‘rûz İstanbul’da Uzunçarşı kurbünde Tomruk sokağı nâm mahalde vâkı‘ Yavaşça Şahin Mehmed Paşa mahallesi İmâmı Hasan Efendi b. Hüseyin ve ahâlîsinden Parmaklıkçı el-Hâc Süleyman Beşe b. Hüseyin ve Lüleci Mustafa Beşe b. Ahmed ve Tönbekici el-Hâc Ebûbekir Alemdâr b. el-Hâc Mehmed ve Fesçi Mehmed Ağa b. el-Hâc Ali ve Bazgancı Ahmed Ağa b. el-Hâc Mehmed ve Tönbekici es-Seyyid el-Hâc Ahmed Ağa b. es-Seyyid Hüseyin ve Fesçi el-Hâc Mehmed Salih b. Yusuf ve Keserci es-Seyyid Hüseyin Beşe b. Mehmed ve Çıkrıkçı Ahmed Beşe b. İbrahim ve Bazgancı es-Seyyid İsmail Ağa b. el-Hâc Ali ve Fesçi Mehmed b. Süleyman ve tüccârdan el-Hâc Abdülaziz Ağa b. Mehmed ve Fesçi Ömer b. Mehmed Salih ve Tönbekici es-Seyyid Abdülgānî Ağa b. Ebûbekir ve Fesçi Ramazan b. Hüseyin ve sâirleri şifâhen sâdır olan fermân-ı âlîlerine imtisâlen Çarşamba günü Arz odasında huzûr-ı hazret-i sadâret-penâhîde ma‘kūd meclis-i şer‘-i münîrde mahalle-i mezbûre ahâlîsinden Haffâf el-Hâc Hasan Ağa b. Hüseyin nâm kimesne [14a] muvâcehesinde merkūm el-Hâc Hasan Ağa ile zevcesi gāibeten ani’l-meclis Şerife Fâtıma bt. Mehmed nâm hatun mahallemiz ahâlîsinden olup lâkin kendi hâllerinde ırz ve edebleriyle meşgūl olmayıp bed-zebân ve hadîdü’l-lisân olduklarından cümlemize muvâcehelerimizde ta‘zîri mûceb elfâz-ı kabîha ile şetm etmeleriyle bi’d-defe‘ât nush ve pend olundukda aslâ mütenebbihler olmayıp ızrârlarında ısrâr üzere olmalarıyla ol-vechile mezbûrândan bir türlü emn ve râhatımız yokdur deyu bi’l-müvâcehe sû-i hâllerinden bahisle iştikâ ve mahalle-i mezbûreden hurûclarını iltimâs ve istid‘â eylediklerinde mezbûr Hasan Ağa dahi zevcesi gāibe-i mezbûre Şerife Fâtıma Hatun ile ma‘an mahalle-i mezbûreden üç gün mürûrunda çıkıp âhar mahalleye nakle müte‘ahhid olduğu İstanbul Mahkemesi’nden huzûr. Fî Gurre-i Za sene [1]241