İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 72 Hüküm no: 35 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat’ta Ayasofya-i Kebîr Vakfı’na ait kahve dükkânın yeniden inşası sırasında yola çıkmalar yapılması sebebiyle dava edildiği Balat’da kahve dükkânı keşfi Ma‘rûz Sâdır olan fermân-ı âlîlerine imtisâlen zikri âtî husûsun mahallinde bi’l-mu‘âyene keşf ve tahrîri’çün savb-ı şer‘-i enverden me’zûnen irsâl olunan kâtib es-Seyyid Ahmed Rıza Efendi bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan Emin Beyefendizâde fazîletlü Mîr Abdülkādir Beyefendi tarafından meb‘ûs kâtib es-Seyyid Mehmed Râcih Efendi Hâssa mi‘mârı hulefâsından Mehmed Said ve Mahmud Halîfeler ile İstanbul hısnı ebvâbından Balatkapısı hâricinde Karabaş Mahallesi’nde Balat İskelesi Meydanı’na gider iken tulumba pîşgâhında vâkı‘ Ayasofya-i Kebîr vakf-ı müsakkafâtından olup bir tarafdan Lonca Sokağı demekle meşhûr mi‘mârân-ı mezbûrân misâhalarıyla bir zirâ‘ üç parmak arzında tarîk-i âm ve verâsı yine vakf-ı mezbûr müstağallâtından mukaddemâ arabacı sergisi ve el-yevm muhterik bahçe arsası ve bir tarafdan tarîk-i âm ve pîşgâhı zikr olunan tulumba ile mahdûd bir bâb kahve dükkânına varıp huzûr-ı müslimînden akd-i meclis-i şer‘-i âlî ettiklerinde mahalle-i mezbûre ahâlîsinden ashâb-ı arzuhâl Kömürcü Sivaslı Murad b. Mehmed ve Arabacı Mahmud Ağa b. Ahmed ve Çavuş es-Seyyid Mehmed Ağa b. Ahmed ve Kayıkçı Ali Çavuş b. İsmail ve Bostanî Bektaş Ağa b. Hüseyin ve Bostanî Ali Ağa b. Mehmed ve Tütüncü es-Seyyid Mehmed Ağa b. es-Seyyid Memiş nâm kimesnelerden her biri meclis-i ma‘kūd-ı mezkûrda zikr olunan kahve dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin münâsafeten mâlikleri derûn-ı arzuhâlde mezkûrü’l-ism Kahveci es-Seyyid İsmail Beşe b. Hasan ve Mehmed Salih Beşe b. Mehmed nâm kimesneler muvâcehelerinde Dârussa‘âdeti’ş-şerîfe ağası hazretleri kâtibi olup vakf-ı mezbûr mütevellîsi es-Seyyid Ahmed Râşid Efendi tarafından mürsel vekîli câbî-i vakf Mehmed Râşid Efendi b. Ahmed nâm kimesne ile mârru’z-zikr kahve dükkânının dört sehm i‘tibâriyle bir sehmine bâ-temessük-i mütevellî bi’l-icâreteyn mutasarrıf olan Haremeyn-i şerîfeyn evkāfı münâdîlerinden Hâfız Mehmed Ağa b. Himmet nâm kimesne ve iki sehm hisse-i şâyiasına kezâlik bâ-temessük-i mütevellî bi’l-icâretyn mutasarrıfe olan mu‘arrefetü’z-zât Rabia Hatun bt. Osman hâzır oldukları hâlde zikr olunan kahve dükkânı bin iki yüz yirmi yedi senesi hilâlinde mahall-i merkūmda vukū‘ bulan harîkde muhterik oldukda dükkân-ı mezkûrun ol-târihde gedik mâliki olan dükkân-ı mezkûru binâ ve inşâ eyledikde verâsında sağ cânibinin ancak bir köşesinden mârru’z-zikr Lonca Sokağı’ndan mi‘mârân-ı mezbûrân misâhalarıyla altı parmak mahallini sâlifü’z-zikr kahve dükkânına ilâve edip ba‘dehû dükkân-ı mezkûr bu def‘a dahi mahall-i mezkûrda bi-kazâillâhi Teâlâ muhterik oldukda el-yevm gedik mâlikleri merkūmân es-Seyyid İsmail Beşe [14b] ve Mehmed Salih Beşe mütevellî-i müvekkil-i mûmâ-ileyhin re’yiyle dükkân-ı mezkûrun verâsında sağ cânibinin köşe temel direğini mukaddemâ yine tarîk-i mezkûra ilâve olunmuş mahalle vaz‘ıla dükkân-ı mezkûru binâ ve inşâ etmeleriyle sâlifü’z-zikr kahve dükkânını hedm-birle mukaddemâ tarîk-i mezkûrdan olarak ilâve olunan altı parmak mahalli tarîk-i merkūma terk etmek üzere mezbûrân es-Seyyid İsmail Beşe ve Mehmed Salih Beşe ile dükkân-ı mezkûr mutasarrıfları hâzırân-ı mezbûrân Hâfız Mehmed Ağa ve Rabia Hatun’ndan her birine tenbîh olunmak murâdımızdır deyu da‘vâya tasaddî etmiş-idik. Lâkin zikr olunan kahve dükkânının verâsında kâin arsa sâlifü’z-zikr iki yüz yirmi yedi senesi harîkinden mukaddem arabacı dükkânı olduğundan araba vaz‘ı’çün arka hammâlânı zikr olunan lonca tarîkine duhûl ve hurûc ve ol-vechile tarîk-i mezkûrdan âhar kimesnenin mürûruna ihtiyâc olmayıp ancak arka hammâlânına tahsîs olmuş olduğundan ba‘zı mechûlü’l-ahvâl kimesneler dahi duhûl ve nice fesâdât peydâ olacağı bedîdâr olmağla zikr olunan arabacı dükkânını ba‘de’l-harîk mutasarrıfı olan kimesneler bahçe edip zikr olunan kahve dükkânının gedik mâliklerine îcâr ve ol-vechile tarîk-i mezkûra duhûl ve hurûca kat‘an kimesnenin ihtiyâcı kalmadığından mahall-i mezkûrda vâkı‘ dekâkîn mâlikleri tarîk-i mezkûra kapı vaz‘ıyla sakflarının damlalık mahalli olarak isti‘mâl ve bu vechile tarîk-i mezkûr terk olunmuş olmağla ancak mezbûrân es-Seyyid İsmail Beşe ve Mehmed Salih Beşe dükkân-ı mezkûra mukaddemâ ilâve olunan altı parmak mahalli tarîk-i mezkûra terk için dükkân-ı mezkûru hedm eylediği takdîrce küllî mutazarrır ve vakf-ı mezkûra dahi muzırr olacağı âşikâr olduğuna binâen muslihûn tavassutuyla beynimiz ıslâh ve tanzîm olunup biz ber-vech-i muharrer tasaddî eylediğimiz da‘vâmızdan rızâmızla fâriğler olmamızla bu vechile kat‘-ı nizâ‘ eyledik deyu merkūmân es-Seyyid İsmail Beşe ve Mehmed Salih Beşe nâm kimesneler ile mütevellî vekîli ve dükkân-ı mezkûr mutasarrıfları hâzırûn-ı mezbûrûnun tasdîklerine mukārin ahâlî-i müdde‘ûn-ı mezbûrûnun eyledikleri takrîrlerini kâtibân-ı mezbûrân mahallinde ketb ve tahrîr ve ma‘an meb‘ûs ümenâ-i şer‘ıle meclis-i şer‘a gelip alâ-vukū‘ihi inhâ ve takrîr eyledikleri İstanbul Mahkemesi’nden huzûr. Fî 21 L sene [1]241