İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 74 Hüküm no: 36 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Zübeyde bt. Mehmed’in, evinin karşısına Berber Agop v. Haçador ile eşi Lusyen bt. Sergiz’in inşa ettiklerin evin üst kat penceresini kapattırmak istediği Pencere keşfi Ma‘rûz Sâdır olan fermân-ı âlîlerine imtisâlen zikri âtî husûsun mahallinde lede’l-mu‘âyene keşf ve tahkīki’çün savb-ı şer‘-i enverden me’zûnen irsâl olunan Kâtib Mehmed Hidâyetullah Efendi dâ‘îleriyle bi’l-ma‘iyye rü’yete memûr nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâmdan Meşreb Efendi hafîdi fazîletlü Mehmed Ârif Efendi tarafından meb‘ûs Kâtib Ali Efendi ve Hâssa mi‘mârı hulefâsından Mehmed Tahir ve Ahmed halîfeler ile nezâret-i hazret-i müşârun-ileyhde olan evkāfdan ashâb-ı hayrâtdan merhûm el-Hâc İbrahim Efendi vakfı müstağallâtından İstanbul’da Salma Tomruk civârında Kefevî Mahallesi’nde vâkı‘ zikri câ’î münâza‘un-fîh olan bir bâb menzile varıp cerîdede mazbûtu’l-esâmî müslimîn huzûrlarında akd-i meclis-i şer‘-i âlî ettiklerinde nezâret-i dâ‘îlerinde olan evkāfdan Hoca Kasım Günânî ve Fâtıma Hatun vakıfları müsakkafâtından ma‘lûmü’l-hudûd bir bâb menzile iki kıt‘a mütevellî temessükleri mantûklarınca bi’l-icâreteyn mutasarrıfe olan sâhib-i arzuhâlin vâlidesi mu‘arrefetü’z-zât Şerife Zübeyde Hatun bt. Mehmed meclis-i ma‘kūd-ı mezkûrda menzil-i mezkûr karşısında tarîk-i âm aşurı? merhûm-ı mezbûr el-Hâc İbrahim Efendi vakfı müstağıllâtından olarak kezâlik ma‘lûmü’l-hudûd bir bâb menzile bâ-temessük-i mütevellî bi’l-icâretyn münâsafeten mutasarrıfları olan derûn-ı arzuhâlde ismi mastûr Berber Agop v. Haçador zimmî ile zevcesi şahsı mu‘arrefe Lusyek? bt. Sergiz nasrâniye muvâcehelerinde zikr olunan el-Hâc İbrahim Efendi vakfının mütevellîsi el-Hâc Halîl Efendi tarafından mürsel Mahmud Ağa b. İbrahim hâzır olduğu halde işbu derûnunda akd-i meclis-i şer‘-i âlî olunan [15a] menzil-i mezkûru zevcân-ı mersûmân bu esnâda hedm-birle müceddeden bir bâb menzil binâ ve inşâ ve fevkānîsinde üç aded ve tahtânîsinde kezâlik üç aded pencereler küşâd ve benim menzil-i mezkûrumun makarr-ı nisvân olan mahallerine nezâret ve havâlesi olmağla nezâret ve havâlesini def‘a zevcân-ı mersûmâna tenbîh olunmak matlûbumuzdur deyu bundan akdem da‘vâya tasaddî etmiş-idik el-hâletü hâzihî beynimize muslihûn tavassutuyla beynimiz ıslâh olunup zevcân-ı mersûmân menzil-i mezkûrun fevkānîsinde küşâd eyledikleri üç aded pencereleri sedd ve pend fakat kesb-i ziyâ için mi‘mârân-ı mezbûrân misâhalarıyla tavana karîb mahalden fedâ yirmi parmak pencerelerin der-i tahtânîsinde küşâd eyledikleri kezâlik üç aded pencerelerin karşısından kerpiçhâne duvarına muttasıl mi‘mârân-ı mezbûrân misâhalarıyla tûlen yedi buçuk zirâ‘ ve kadden dört buçuk zirâ‘ olarak poyralıktan dökme ve omurgadan kuşaklı menzil-i mezkûrdan payandalı tahta havâle ile nezâret ve havâlesini def‘a ta‘ahhüd eylediklerinde ben dahi vech-i meşrûh üzere ta‘ahhüdlerini kabûl edip bu vechile kat‘-ı nizâ eyledik deyu ikrâr ve tasdîklerini kâtibân-ı mezbûrân mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihi inhâ ve takrîr eyledikleri İstanbul Mahkemesi’nden huzûr. Fî 2 Za sene [1]241