İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 79 Hüküm no: 40 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmeğe on dirhem zam, koyun etine bir para indirim yapıldığı Nân-ı azîze on dirhem zam ve lahm-ı ganem narhı Ma‘rûz Hamden lillâhi Teâlâ avn ve inâyet-i Hazret-i İlâhî ve mahz-ı hulûs-ı meymenet-mahsûs-ı cenâb-ı zıllullâhî ile zahîrede feyz ve bereket zâhir ve müsellem ve sâye-i merhamet-vâye-i hilâfet-penâhîlerinde kâffe-i ibâdullâhın refâh-ı hâlleri matlûb ve mültezim olduğuna binâen işbu bin iki yüz kırk bir senesi Zilka‘detü’ş-şerîfesinin on birinci gününden nân-ı azîzin dirhem-i sâbıkı olan seksener dirhem üzerine onar dirhem <> zamm ile doksan dirhem nân-ı azîz iki paraya füruht olunmak bâbında zahîre nâzırı izzetlü efendi bendelerinin takrîri bâlâsına bu dâ‘îlerine hitâben ve lahm-i ganemin dahi fiy’ât-ı sâbıkası olan otuz bir paranın rahmen li’l-ibâd ve şimdilik bir parası tenzîl ile beher vukıyye lahm-i ganem otuz paraya bey‘ olunmak bâbında beyâz üzerine bu dâ‘îleriyle hâssa kasabbaşısı ağa çâkerlerine hitâben şeref-bâş-ı sahîfe-i sudûr olan fermân-ı cihân-mutâ‘ları İstanbul Mahkemesi’ne vürûd ettikde usûl-i nizâm-ı belde üzere bunlara kıyâs ve nisbet ile fiy’âtlarının tanzîmini lâzım gelen francala ve simid ve çörek ve börek ve gevrek ve poğaça ve kâhî ve lokma ve gözleme ve bunların emsâli eşyâ ve envâ‘-ı dakīkin dahi dirhemlerine zam ve fiy’âtları tenzîl olunarak hesâb ve nizâmına tatbîk olundukdan sonra kassabân ve habbâzân ve uncuyân ve çörekciyân esnâfı ve sâir bi’l-cümle lâzımu’l-huzûr der-akab meclis-i şer‘-i şerîfe celb ile muktezâ-yı emr ve irâde-i seniyye her birinin gûş-ı hûşlarına gereği gibi tefhîm ve telkīn olundukda onlar dahi ser-bezmîn-i îfâ-yı merâsim-i mutâva‘at ve hemen şimdi varıp cümlesi mûceb-i emr u irâde-i isâbet-âde-i aliyye üzere i‘mâl ve bey‘a şürû‘ ve mübâşeret ve inkıyâd ve imtisâle fart-ı müsâra‘at edeceklerini takrîr-birle da‘vât-ı icâbet-gāyât-ı hazret-i zıllullâhîye muvâzabet üzere oldukları ma‘lûm-ı ilm-i âlem-ârâları buyuruldukda ol-bâbda ve her hâlde emr u fermân hazret-i veliyyü’l-emrindir. Fî 18 Zilka‘de sene 1241