İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 78 Hüküm no: 39 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayavansaray’da turşucu Kirkor v. Takfor’un, Hüseyin Usta b. Halil’i kendi dükkânı yakınında turşucu dükkânı açtığını şikâyet ettiği Ma‘rûz Âsitane-i aliyyede vâkı‘ turşucu esnâfından sâhib-i arzuhâl Kirkor v. Takfor nâm zimmî meclis-i şer‘-i münîrde esnâf-ı merkūmeden derûn-ı arzuhâlde mezkûrü’l-ism Hüseyin Usta b. Halil muvâcehesinde esnâf-ı merkūme kethüdâsı Mustafa Ağa ve Yiğitbaşısı Ahmed Usta ve ihtiyârlarından Veliyyüdîn Usta ve Mehmed Usta ve Osman Usta ve İbrahim Usta ve Hasan Usta ve sâirleri hâzır oldukları hâlde mezbûr Hüseyin Usta bu esnâda İstanbul’da Ayvansaray kurbünde Lonca nâm mahalde kâin benim turşucu dükkânım civârında hamam karşısında tedârük eylediği arsa üzerine bir bâb turşucu dükkânı binâ ve derûnunda turşuculuk edip benim ticâretime kesâd vermekle men‘ olunup mahall-i mezkûrda turşuculuk ancak bana hasr ve tahsîs olunmak murâdımdır dedikde istikşâf-ı hâl için [16a] mezbûr Hüseyin Usta isticvâb olundukda benim dükkân inşâ eylediğim arsa üzerinde baş muhâsebede mukayyed ve taht-ı nizâma dâhil ve mu‘teber bir bâb kadîm turşucu dükkânı mebnî iken bundan akdem ol-havâlîde vukū‘ bulan harîkle muhterik oldukda mutasarrıfının binâya kudreti olmadığına binâen alâ-hâlihî terk etmiş-idi el-hâletü hâzihî ben destûr almış usta olduğumdan esnâfımızın re’y ve ma‘rifeti ve mutasarrıfının izni ile dükkân-ı mezkûr arsasına kadîmi üzere bir bâb turşucu dükkânı binâ ve harîkden tahlîs olunmuş olan mu‘teber gedik âlâtını dahi mâliki Ahmed Usta’dan sekiz yüz guruş semen-i medfû‘a iştirâ ve dükkân-ı mezkûra vaz‘la ber-mûceb-i şurût-ı nizâm derûnunda san‘atım olan turşuculuk etmekde olmamla ol-vechile dükkân-ı mezkûr muhdes olmayıp taht-ı nizâma dâhil kadîm ve mu‘teber turşucu dükkânıdır fi’l-vâkı‘ hâmiş-i arzuhâlde mastûr baş muhâsebeden derkenâr olunan emr-i âlî-şân kaydında Ayvansaray’da biri Lonca’da biri hamam karşısında iki bâb turşucu dükkânı olduğu müstebân ve münâza‘un-fîh olan dükkân-ı mezkûr emr-i âlîde hamam karşısında deyu münderic olan dükkân olup ol-vechile mezbûr Hüseyin Usta’nın mahall-i mezkûra kadîmi üzere turşucu dükkânı binâsı mazmûn-ı emr-i âlîye mutâbık ve şurût-ı nizâmlarına muvâfık idüğü esnâf-ı hâzirûn-ı merkūmûnun ihbârlarıyla zâhir ve nümâyân olmağın bu sûretle mersûm Kirkor zimmînin merkūm Hüseyin Usta’yı men‘ ve kendüye hasr dâ‘iyesi şer‘an ve kānûnen iltifâta şâyân olmadığı kendüye tefhîm ve bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 29 L sene [1]241