İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 80 Hüküm no: 42 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule haricinde birinci salhaneye bağlı olan Yani v. Dimitri’nin kasap dükkânı gediğini Halil Usta b. Süleyman’a devrettiği Kasab ferâğı Hudâvendigâr-ı esbak cennet-mekân firdevs-âşiyân Sultân Abdülhamîd Hân tâbe serâhû hazretleri evkāf-ı şerîfelerinden Yedikule hâricinde kâin gayrı-ez-selhhâne-i mîrî on aded ganem selhhânelerinden birinci selhhâneye merbût kasaba-i Tophane’de Kapı İçi nâm mahalde vâkı‘ bir bâb kasab dükkânı derûnunda mevcûde gedik ta‘bîr olunan âlât-ı lâzıme-i ma‘lûmenin sümün hissesine mutasarrıf olan Yani v. Dimitri zimmî meclis-i şer‘-i münîrde kasab esnâfından Halil Usta b. Süleyman muvâcehesinde ber-vech-i muharrer mutasarrıf olduğum sümün hissemi hüsn-i rızâ ve tayyib-i hâtırım ve ferâğ-ı mu‘teber-i kat‘î ile merkūm Halil Usta’ya bedel-i ma‘lûm ve makbûz mukābelesinde bâ-re’yi mütevellî ferâğ ve tefvîz ve vech-i lâyıkı üzere teslîm eylediğimde ol-dahi ber-vech-i muharrer tefevvüz ve kabûl etmekle fî-mâ-ba‘d hisse-i mezkûre merkūm Halil Usta’nın dâhil-i havza tasarrufu olup benim alâkam kalmamışdır deyu ba‘de’l-ikrâr ve’t-tasdîk mersûm Yani zimmînin temessükü kazâen zâyi‘ olmuş olmağla zuhûr eder ise amel ve i‘tibâr olunmamak şartıyla kaydı mûcebince hisse-i mezkûre mersûm Yani zimmînin ferâğından defter-i vakf-ı şerîfde merkūm ismine tashîhan kayd ile yedine müceddeden bir kıt‘a temessük i‘tâ buyurulmasını istid‘â eyledikleri İstanbul Mahkemesi’nden huzûr. Fî 25 L sene [1]241