İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 80 Hüküm no: 43 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule’de Irgat Pazarı’ndaki fırın ve değirmen sahibi İbrahim b. Mustafa’nın sekiz adet beygirini Mehmed Said b. Osman’a sattığı Habbâz fırını mübâya‘ası Ma‘rûz Âsitâne-i aliyyede vâkı‘ habbâz tâifesinden İbrahim b. Mustafa nâm kimesne meclis-i şer‘-i münîrde tâife-i merkūmeden Mehmed Said b. Osman nâm kimesne muvâcehesinde habbâzân kethüdâsı Mehmed Ağa ve nizâm ustalarından Murad Usta ve Ömer Usta ve Süleyman Usta ve Kasım Usta ve sâirleri hâzır oldukları hâlde İstanbul Yedikule dâhilinde Irgad Pazarı nâm mahalde vâkı‘ ma‘lûmü’l-hudûd bir bâb habbâz fırını ve ona merbût altı horoslu bir kıt‘a habbâz değirmeni derûnlarında mevcûde gedik ta‘bîr olunur yirmi dört re’s bârgir ve sâir âlât-ı lâzıme-i ma‘lûmenin dört re’s bârgir ve onlara isâbet eden âlât-ı ma‘lûme Acî Kerope nâm zimmînin ve mâ‘adâ yirmi re’s bârgir ve onlara isâbet eden âlât-ı ma‘lûme dahi benim bâ-sûret yedimizde malımız olmağla hâlâ ben ber-vech-i muharrer mâlik olduğum sâlifü’z-zikr yirmi re’s bârgirin on iki re’s bârgiriyle onlara isâbet eden âlât-ı ma‘lûmeyi mülkümde ibkā etmemle mâ‘adâ sekiz re’s bârgirleriyle onlara isâbet eden âlât-ı ma‘lûmeyi tarafeynden bi’l-îcâb ve’l-kabûl bâtten ve sahîhan bi-safka-i vâhide merkūm Mehmed Said’e on dokuz bin guruşa bey‘ ve temlîk ve vech-i lâyıkı üzere teslîm ol-dahi ber-vechi muharrer iştirâ ve temellük ve tesellüm ve kabz ve kabûl eyledikden sonra semen-i merkūm on dokuz bin guruşun on bir bin iki yüz guruşunu zehâir esmânından cânib-i mirîye deynim olan ma‘lûmü’l-mikdâr meblağın ol-mikdârına mahsûben kabzına memûre ve yedi bin sekiz yüz guruşunu dahi kapan-ı dakīk tüccârından ma‘lûmü’l-esâmî kimesnelere kezâlik zahîre semeninden deynim olan mebâliğ-i ma‘lûmenin ol-mikdârına mahsûben tüccâr-ı merkūmûna edâ ve teslîm etmek üzere ihâle eylediğimde ol-dahi kabûl ve semen-i mezkûru mevkūfât kaleminde mukayyed rabt olunan taksîti vechile şurût-ı nizâmımız üzere te’diye ve îfâya ta‘ahhüd etmekle mebî‘-i mezkûrun tağrîr ve gabnine müte‘allıka da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fî-mâ-ba‘d zikr olunan sekiz re’s bârgir ve onlara isâbet eden âlât-ı lâzıme-i ma‘lûmede benim alâkam kalmayıp mezbûr Mehmed Said’in mülk-i müşterâsı ve hakk-ı sarfı olmuşdur deyu ba‘de’l-ikrâr ve’t-tasdîk fırın ve değirmen-i mezkûr gediklerinden zikr olunan yirmi re’s [17a] bârgirin on iki re’si merkūm İbrahim üzerinde ibkā olunarak başka ve mâ‘adâ sekiz re’si mezbûr Mehmed Said’in ismine tashîhan kayd ile başka sûretleri i‘tâ buyurulmasını istirhâm ve istid‘âları şurût-ı nizâma muvâfık olduğunu kethüdâ ve nizâm ustaları hâzirûn-ı merkūmûn ihbâr ve inhâ etmeleriyle bu sûretle istid‘âsına müsâ‘ade-i seniyyeleri erzânî buyurulur ise ber-mûceb-i şurût-ı nizâm kayd ve başka başka sûretleri i‘tâ olunmak bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 2 Za sene [1]241