İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 96 Hüküm no: 59 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Bulgurlu Mescid mahallesi sâkinlerinden Şerife Ayşe Suada bt. es-Seyyid İbrahim Edhem’in, kocasından muhâla‘a yoluyla boşanması Muhâla‘a Ma‘rûz Medîne-i Üsküdar’da Bulgurlu Mescid Mahallesi’nde sâkine derûn-ı arzuhâlde mezkûretü’l-ism mu‘arrefetü’z-zât Şerife Âişe Suadâ bt. es-Seyyid İbrahim Edhem nâm hatun meclis-i şer‘-i münîrde zevc-i muhâli‘i Rumeli kuzâtından sâhib-i arzuhâl es-Seyyid Mustafa Efendi b. Hasan Ağa nâm kimesne muvâcehesinde mezbûr es-Seyyid Mustafa Efendi mehr-i mu‘accel-i müstevfâ ve iki yüz elli guruş mehr-i mü’eccel tesmiyesiyle zevc-i dâhilim olup lâkin beynimizde hüsn-i muâşeretimiz olmamağla zimmetinde mütekarrır ve ma‘kūdun aleyh olan iki yüz elli guruş mehr-i müeccelim ile nafaka iddet-i mu‘ayyene-i ma‘lûmem üzerlerine me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol-dahi hul‘-ı mezkûru ba‘de’l-kabûl hukūk-ı zevciyyete ve ibtidâ-ı zevciyyetden işbu târih-i i‘lâma gelince sâir beynimizde cereyân eden cemî‘-i hukūk-ı şer‘iyeye müte‘allıka mutlakā âmme-i da‘vâ ve kâffe-i mutâlebâtdan her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyu ikrâr ve tasdîkleri İstanbul Mahkemesi’nden tescîl ve huzûr. Fî Selh-i Za sene [1]241