İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 104 Hüküm no: 70 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiler-i hâssa ocağı neferlerinden Amasyevî İmamoğlu Hasan Ağa b. Hüseyin’in, Vartan bt. Kirah’a verdiği borç karşılığı zabtettiği dükkânı tahliyeye tenbih 2342 guruş ile rehin olan kalpakçı dükkânını tahlîsine tenbîh Ma‘rûz Kilâr-ı hâssa ocağı neferâtından sâhib-i arzuhâl Amasyevî İmâmoğlu Hasan Ağa b. Hüseyin nâm kimesne İstanbul Mahkemesi’nde meclis-i şer‘-i münîrde İstanbul’da Kumkapı kurbünde Çadırcı Ahmed Çelebi Mahallesi’nde mütemekkine derûn-ı arzuhâlde mastûretü’l-ism şahsı mu‘arrefe Vartan bt. Kirah nâm nasrâniye muvâcehesinde nasrâniye-i mersûmenin damadı tüccâr tâifesinin perâkende kolu neferâtından Ahırkapılı Artin v. Sahak zimmî hâzır olduğu halde ben işbu târih-i i‘lâm senesi Cumâdelulâsı’nın on yedinci günü malımdan hâzır-ı mersûmun kefâletiyle mesfûre Vartan nasrâniyeye iki bin beş yüz guruş idâne ve teslîm ol-dahi istidâne ve kabz ve mukābelesinde her ne zaman edâ-i deyn eder ise red ve ferâğ olunmak şartıyla İstanbul’da Kalpakçılarbaşı’nda Saksılı Hân’ın karşısında kalpakçı Artin ve Andreyas zimmîler dükkânları beynlerinde kâin bâ-temessük-i mütevellî bi’l-icâreteyn müstakillen mutasarrıfe olduğu bir bâb [24a] vakıf kalpakçı dükkânını bâ-re’y-i mütevellî bana ferâğ ve derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme ile malından üçer taşlı iki elmâs yüzük ve bir İngiliz-kârî üç zarflı koyun sîm sâ‘ati ve etrâfı elmâslı bir çift zümrüd küpe ve tek başlı bir inci kuşak ve iki dizi ile bir mikdâr düğme inciyi dahi yedime rehn ve vaz‘ ve teslîm eylediğinde ben dahi ber-vech-i muharrer irtihân ve tesellüm ve kabz etmişdim lâkin benim mukaddemâ meblağ-ı mezkûr için mersûme Vartan nasrâniyenin malından bir sîm koyun sâ‘ati devriyle murâbaha olarak ceste ceste makbûzum olan yüz elli sekiz guruş şer‘an asl-ı deyn-ı meblağ-ı mezkûr iki bin beş yüz guruşun ol-mikdârına takās olunmağla bâkīsi olan iki bin üç yüz kırk iki guruşu bana edâ ve teslîm-birle ber-vech-i muharrer şart-ı mezkûr ile olan ferâğ-ı mezkûrun adem-i sıhhatine binâen dükkân-ı mezkûrdan bâ-re’y-i mütevellî keff-i yed ve âlât-ı gedik-i mezkûr ile hulliyât-ı mezkûreyi rehîninden fekk ve tahlîse mersûme Vartan nasrâniyeye tenbîh olunmak matlûbumdur deyu hâzır-ı mersûmun tasdîkiyle da‘vâ ettikde ol-dahi cevâbında kaziyye minvâl-i muharrer üzere olduğu bi-tamâmihâ tâyi‘aten ve kat‘iyyen ikrâr ve i‘tirâf etmeğin mûcebince meblağ-ı bâkī-i mezkûr iki bin üç yüz kırk iki guruşu müdde‘î-i merkūm Hasan Ağa’ya edâ ve teslîm-birle sâlifü’l-beyân dükkânı bâ-ma‘rifet-i mütevellî Tanadil? nasrâniye-i mersûmenin zabt ve tasarrufu iktizâ eylediği ve âlât-ı gedik-i mezbûr ile huliyyât-ı mezbûreyi rehîninden fekk ve tahlîse dahi mersûme Vartan nasrâniyeye tenbîh olunduğu huzûr. Fî 5 Z sene [1]241