İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 103 Hüküm no: 69 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Halil Ağa b. es-Seyyid İbrahim’in evinin duvarlarını yapan duvarcı ustalarının, Halil Ağa’da kalan alacaklarını alamadıkları Sulh ve mâ‘adâdan ibrâ 700 guruş Ma‘rûz Sâdır olan fermân-ı âlîlerine imtisâlen husûs-ı âtiyyü’l-beyânın mahallinde ketb ve tahrîri’çün cânib-i şerî‘at-ı garrâdan me’zûnen irsâl olunan kâtib Hasan Şükrü Efendi İstanbul’da Lâleli Câmi‘-i Şerîfi kurbünde Molla Kestel mahallesinde vâki’ hâlâ ser-mi‘mâr-ı hâssa ağa konağında huzûr-ı müslimînde akd-i meclis-i şer‘-i âlî ettikde duvarcı tâifesinden sâhib-i arzuhâl Danyel v. Kirkor ve şerîki Artin v. Kabril nâm zimmîler meclis-i ma‘kūd-ı mezkûrda nakkāş esnâfından derûn-ı arzuhâlde mezkûrü’l-ism Mehmed Sâdık b. Mustafa b. Mehmed nâm kimesne tarafından ber-vech-i âtî sulh ve ibrâya vekîl olduğu zeyt yağcı İbrahim Edhem Ağa b. el-Hâc Ömer ve Tütüncü Nuh Nuri Ağa b. Mustafa nâm kimesneler şehâdetleriyle ber-nehc-i şer‘î sâbit olan Çinili Hamam hamamcısı es-Seyyid Halil Ağa b. es-Seyyid İbrahim nâm kimesne muvâcehesinde biz bundan akdem müvekkil-i merkūm Mehmed Sâdık’ın bi-şarti’r-rücû‘ emriyle Sultan Ahmed Hân aleyhi’r-rahmeti ve’l-gufrân hazretleri câmi‘-i şerîfi civârında Cündî Meydanı’nda Akar Çeşme nâm mahalde vâkı‘ mutasarrıf olduğu bir bâb menzilinin etrâf-ı erba‘asına olan duvarını binâ ve inşâ etmemizle gerek bizim ve gerek sâir duvarcı ve rençberân yevmiyeleriyle eyyâm-ı ma‘lûmede müşterek malımızdan verip ol-vechile müvekkil-i mezbûrun zimmetinde bi’l-mürâca‘a alacağımız olan bin dokuz yüz altmış guruşun bin altmış guruşunu müvekkil-i mezbûr mukaddemâ bize edâ ve teslîm biz dahi yedinden ahz ve kabz etmemizle bâkīsi olan dokuz yüz guruşu müvekkil-i merkūma izâfetle vekîl-i mezbûrdan hâlâ taleb ederiz deyu tasaddî eylediğimiz da‘vâmızdan bâ-tavassut-ı muslihîn vekîl-i merkūm es-Seyyid Halil Ağa ile bi’tav‘ ve’r-rızâ yedi yüz guruş üzerine sulh olduğumuzda ol-dahi sulh-i mezbûru bi’l-vekâle ba‘de’l-kabûl bedel-i sulh mezkûr yedi yüz guruşdan mâ‘adâ meblağ-ı mezbûr dokuz yüz guruşa varınca ziyâdesi olan ancak iki yüz guruşa müte‘allıka da‘vâdan müvekkil-i mezbûrun zimmetini kabûlü hâvî ibrâ ve ıskāt eyledik deyu ba‘de’l-ikrâr ve’t-tasdîk ibrâdan müstesnâ bedel-i sulh mezkûr yedi yüz guruş müvekkil-i mezbûrun müdde‘iyân-ı şerîkân-ı mersûmân zimmetinde sahîhan deyni olduğunu vekîl-i merkūm es-Seyyid Halil Ağa bi’l-vekâle tâyi‘ân ve kat‘iyyen ikrâr ve i‘tirâf etmeğin alâ-mûcebi i‘tirâfihî bedel-i sulh-i mezkûr yedi yüz guruşun müdde‘iyân-ı mersûmâna edâ ve teslîmiyle vekîl-i merkūm es-Seyyid Halil Ağa’yı ilzâm eylediklerini kâtib-i merkūm mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği ba‘de’t-tenfîz İstanbul <> Mahkemesi’nden huzûr. Fî 5 Z sene [1]241