İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 106 Hüküm no: 72 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İbrahim’in, el-Hâc Süleyman Ağa b. Mahmud’dan aldığı cariyeyi, hastalandığını için iade etmek istediği Ma‘rûz Sâhib-i arzuhâl ocak tatarlarından Mehmed Ağa b. İbrahim meclis-i şer‘de kapan-ı dakīk tüccârından el-Hâc Süleyman Ağa b. Mahmud muvâcehesinde şehr-i sâbık Zilka‘detü’ş-şerîfenin on beşinci günü cemî‘-i uyûbdan sâlime olmak üzere merkūm el-Hâc Süleyman Ağa’dan bin iki yüz yirmi beş guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis ma‘lümetü’l-vasf bir re’s zenciye câriye târih-i mezkûrdan bir hafta mürûrunda hummâ-yı vebâiye illeti zuhûruyla mahmûme olup ol-vechile mu‘ayyebe ve ayb-ı mezkûr şirâ’ târihinden kadîm inde’t-tüccâr noksân semen îcâb eder uyûbdan olmağla redd-i semen ve kabz-ı mebî‘ olunmak matlûbumdur deyu teveccüh-i husûmet bulundukdan sonra da‘vâ ve mezbûr el-Hâc Süleyman Ağa dahi câriye-i hâzıra-i mezbûreyi ol-mikdâr guruş semen-i makbûza bey‘ini ikrâr ayb-ı mezkûrunun kıdemini inkâr etmekle müdde‘î-i mezbûr Mehmed Ağa ber-vech-i muharrer müdde‘âsına ikāmet-i beyyine edemeyip bi’t-taleb merkūm el-Hâc Süleyman Ağa bi’l-müvâcehe ber-nehc-i şer‘î tahlîf olunmağın mûcebince müdde‘î-i merkūm Mehmed Ağa ber-vech-i muharrer müdde‘âsıyla merkūm el-Hâc Süleyman Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 15 Z sene [1]241