İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 106 Hüküm no: 73 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Oseb, Tülbetnçi Kegork ve Kürkçü Kirkor’un evleri ile Sünbül v. Nikola ile aralarında bulunan duvarın yıkılması Ma‘rûz Ashâb-ı arzuhâl Keresteci Oseb ve Tülbentçi Kegork ve Kürkçü Kirkor evlâd-ı Aslan zimmîler meclis-i şer‘-i münîrde İstanbul’da Samatya nâm mahalde şerbetçi tâifesinden derûn-ı arzuhâlde mezkûrü’l-ism Sünbül v. Nikola nâm zimmî muvâcehesinde İstanbul’da Koca Mustafa Paşa mahallesinde kâin bir tarafdan mesfûr Sünbül zimmî menzili ve bir tarafdan mersûmun şerbethânesi ve tarafeyni tarîk-i âm ile mahdûd beher şehr altmış akçe icâre-i müeccelelü bir bâb vakıf menzil ale’l-iştirâki’s-seviy uhdemizde ve menzil-i mezkûr ile sâlifü’z-zikr mersûmûn menzili beynlerinde kâin mersûmun ve bizim duvarlarımız bu def‘a münhedim oldukda mersûm Sünbül zimmînin te‘addîsinden nâşî hedm olmuşdu deyu tazmîn da‘vâsına tasaddî etmişdik el-hâletü hâzihî biz hakīkat-i hâle muttali‘ olduğumuzda duvar-ı mezkûr kimesnenin sun‘ ve te‘addîsi olmaksızın münhedim olmuş olduğu ma‘lûmumuz olup ol-vechile da‘vâ-yı mezkûremizden fâriğ olarak menzileyn-i mezkûreyn beynine teberru‘an li’l-vakf duvar inşâsıyla sütre ittihâzına ve tarafeyn sarf edeceğimiz mebâliği beynimizde ber-vech-i iştirâk harc ve sarf edip duvar-ı mezkûru dahi fî-mâ ba‘d müşterek olmak üzere bi’t-terâzî isti‘mâli ta‘ahhüd etmemizle bi’l-cümle husûs-ı mezkûre ve hukūk-ı sâire-i şer‘iyyeye müte‘allıka âmme-i da‘vâdan [24b] bizim mersûm Sünbül zimmînin zimmetini ol-dahi kezâlik bizim zimmetimizi her birimiz şurût-ı müfsideden ârî ve uhûd-ı mubtıladan berî cebr ve kerhden hâlî ibrâ-i âmm-i sahîh-i şer‘î ve ıskāt-ı tâmm-ı sarîh-i mer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyu mukırrûn-ı mersûmûn Oseb ve Kegork ve Kirkor zimmîlerin bi’l-cümle takrîr-i meşrûhlarını mesfûr Sünbül zimmî vicâhen ve şifâhen tasdîk ve tahkīk ve duvar-ı mezkûru vech-i meşrûh üzere iştirâken ve teberru‘an li’l-vakf binâ ve inşâya ta‘ahhüd ve bu vechile külliyen kat‘-ı nizâ‘ ve ref‘-i husûmet eyledikleri İstanbul Mahkemesi’nden huzûr-ı âlîlerine i‘lâm olundu. Fî 3 Za sene [1]241