İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 119 Hüküm no: 88 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Ohannes’in kaybettiği kesesini bulan Hristo v. Kostandi ile anlaştığı Ma‘rûz İstanbul’da Sarıgez [Sarıgörez] Çarşısı’nda Terzi Agop v. Ohannes zimmî meclis-i şer‘-i münîrde Vâlide Hânı’nda mütemekkin Nemçelü Hristo v. Kostandi nâm müste’men muvâcehesinde mersûmun yazıcısı Nemçelü Dimitraki v. Panayot ile tercümânı Rap hâzır oldukları hâlde işbu târihden sekiz ay mukaddem Kalpakçılarbaşı’nda gider iken içinde bin seksen guruşa mu‘âdil ecnâs altın mevzû‘ kesemi koynumdan düşürüp ba‘dehû tecessüs ederek müste’men-i mesfûrun yedinde olduğunu haber aldığımdan varıp taleb eylediğimde ancak sekiz yüz seksen sekiz guruşluğunu bi’t-tasdîk bana teslîm edip mâ‘adâ yüz doksan iki guruşa mu‘âdil on altı aded Adlî altınını bi-gayrı hakkın yedinde alıkomagla suâl olunup zikr olunan altınlar mevcûd ise aynılarını müstehlek ise misillerini mersûm Hristo’dan taleb ederim deyu da‘vâ eylediğimde ol-dahi cevâbında zikr olunan altınları yazıcım mersûm bulup bana vermekle sâhibi müdde‘î-i mesfûr dahi gelip taleb eylediğinde zikr olunan on altı aded Adlî altınını müjdegâne nâmıyla bana hîbe ve yedimde ibkā ile mâ‘adâsını ahz etmişdi deyip ol-vechile beynimiz ıslâh olunup ben ber-vech-i muharrer tasaddî eylediğim da‘vâmdan müste’men-i mesfûr ile bi’t-tav‘ ve’r-rızâ doksan guruşa sulh olduğumda ol-dahi sulh-i mezkûru kabûl ve bedel-i sulh-ı merkūm doksan guruşu meclis-i sulhde kable’l-mufâraka bana def‘ ve teslîm ben dahi ahz ve kabz edip ziyâdesine ve bi’l-cümle husûs-ı mezkûra müte‘allıka da‘vâdan ben mersûm Hristo ile yazıcı hâzır-ı mersûm Dimitraki’nin zimmetlerini onlar dahi kezâlik benim zimmetimi her birimiz ibrâ-i âm ile kabûlü hâvî ibrâ ve ıskāt eyledik deyu ikrâr ve tesâdukları İstanbul Mahkemesi’nden huzûr. Fî 17 Zilhicce sene [12]41