İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 120 Hüküm no: 89 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varosçu esnafının yedi yıllık hesaplarının görüldüğü Varoscu esnâfının 1000 [guruş] ahz ve kabz ile ibrâları Ma’rûz Sâdır olan fermân-ı âlîlerine imtisâlen işbu arzuhâl ve zahrında mastûr tersâne-i âmire emîni sa‘âdetlü efendi bendelerinin i‘lâmına ve merbût olan defterlere ba‘de’n-nazar ashâb-ı arzuhâl varoscu esnâfından Yanko v. Hristo ve Vasil v. Yorgi ve Pagori v. Nikola zimmîler asâleten ve Yorgi v. Lefter zimmî kendi nefsinden asâleten ve Mihal v. Andon zimmî tarafından vekîl-i müsbeti olmağla vekâleten ve Apostol v. Lefter zimmî kezâlik kendi nefsinden asâleten ve Yani v. Nikola zimmî tarafından vekîl-i müsbeti olmağla vekâleten ve Pandeli v. Lefter zimmî kezâlik kendi nefsinden asâleten ve Tanaş v. Manol zimmî tarafından vekîl-i müsbeti olmağla vekâleten ve Efrim v. Şahin zimmî kezâlik kendi nefsinden asâleten ve Mihal v. Yorgi zimmî tarafından vekîl-i müsbeti olmağla vekâleten her biri bi’t-terâzî dâ‘î-hânelerinde ma‘kūd meclis-i şer‘-i münîrde derûn-ı arzuhâlde isimleri mezkûr kābız-ı mal Yasef v. Mihal ve tersâne-i âmire voruscubaşısı Foti ve. Yani zimmîler muvâcehelerinde i‘lâm-ı mezkûrda derc ve iş‘âr kılındığı üzre tersâne-i âmireden i‘mâl ettirilen mancına ve su varili ve zeytin fıçısı ve gerdel ve çenber ve sâire bu makūle mühimmât-ı lâzıme-i mîrîyenin cânib-i mîrîden verilen fiy’âtdan ziyâdesi imdâdiye nâmıyla esnâfımız beyninde ta‘dîl [28a] ve tesviye şurûtuna ri‘âyetle tevzî‘ ve taksîm olunarak senede bir kere hesâbımız rü’yet ve cânib-i mîrîden verilen meblağı tersâne <> varoscubaşısı ma‘rifetiyle ahz ve esnâfımız imdâdiyesi dahi kābız-ı mâl ma‘rifetiyle cem‘ olunup herkesin alacağı vereceğine muvâzene ve mahsûb ve fazlası iktizâ-i vechile red ve edâ olunmak usûl-i kadîmemizden iken kābız-ı mal ve varoscubaşı mesfûrân yedi seneden beri hesâbımızı rü’yet etmediklerine binâen zimmetlerinde külliyetli alacağımız terâküm etmişdi el-hâletü hâzihî mesfûrân ile muhâsebemiz rü’yet olundukda her birimizin doksan birer guruş otuz altışar para birer akçeden mesfûrân zimmetlerinde bin guruş hakkımız zuhûr ettikde onlar dahi tasdîk ve meblağ-ı mezkûru vech-i meşrûh üzere bize edâ ve teslîm biz dahi asâleten ve vekâleten ahz ve kabz edip mâ‘adâ zimmetlerinde bir nesne hakkımız kalmamağla bi’l-cümle husûs-ı mezkûre ve ziyâde mutâlebesine müte‘allıka âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eylediğimizden mâ‘adâ fî-mâ ba‘d usûl-i kadîmemiz üzere sene-be-sene hesâbımız rü’yet ve kadîmi vechile amel ve hareket olunmak üzere bi’t-terâzî tanzîm eyledik deyu takrîrlerini mesfûrân Yasef ve Foti zimmîler tasdîk ve külliyen kat’-ı nizâ eyledikleri İstanbul Mahkemesi’nden huzûr-ı âlîlerine i‘lâm olundu. Fî 28 Za sene [1]241