İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 122 Hüküm no: 92 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın, Yağlıkçı Dellali Mehmed b. Ömer’de olan 800 kuruş alacağında 300 kuruşa sulh oldukları Ma‘rûz İstanbul’da Sultan Ahmed kurbünde İshak Paşa mahallesinde sâkine sâhibe-i arzuhâl mu‘arrefetü’z-zât Hatice bt. Abdullah nâm hatun meclis-i şer‘-i münîrde derûn-ı arzuhâlde ismi mezkûr Yağlıkçı Dellâli Mehmed b. Ömer muvâcehesinde mezbûr Mehmed zimmetinde cihet-i karzdan alacak hakkım olan iki bin dört yüz guruşun altı yüz guruşunu nakden bana edâ ve bin guruşuna mahsûben dahi malından bir halâlî sâ‘at ve bir donluk beyaz şâl ve bir kakım zenne kürkünü bana bey‘ ve teslîm ve ol-vechile deyn-i mezkûrun bin altı yüz guruşunu bana îfâ etmekle bâkīsi olan sekiz yüz guruşu mezbûr Mehmed’den taleb ederim deyu tasaddî eylediğim da‘vâmdan bâ-tavassut-ı muslihîn merkūm Mehmed ile bi’t-tav‘ ve’r-rızâ üç yüz guruşa sulh olduğumda ol-dahi sulh-i mezkûru ba‘de’l-kabûl ziyâdesine ve bedel-i sulh-i mezkûrdan mâ‘adâ bi’l-cümle husûs-ı mezkûra müte‘allıka da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyu ba‘de’l-ikrâr ve’t-tasdîk ibrâdan müstesnâ bedel-i sulh merkūm üç yüz guruşun müdde‘iye-i mezbûre Hatice Hatun’a edâsıyla mezbûr Mehmed ilzâm olunduğu İstanbul Mahkemesi’nden huzûr. Fî 24 Z sene [12]41