İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 122 Hüküm no: 91 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoylu Mehmed b. el-Hâc Abdullah’ın, Tütüncü Bogos v. Avanes’ten aldığı yedi yüz miskal gül yağının sahte olduğu Ma‘rûz İran tüccârından derûn-ı arzuhâlde ismi mezkûr Hoylu Mehmed b. el-Hâc Abdullah meclis-i şer‘-i münîrde sâhib-i arzuhâl Tütüncü Bogos v. Avanes zimmî muvâcehesinde ben işbu târihden yedi ay mukaddem beher miskāli doksanar paraya olmak üzere mesfûrdan iştirâ ve kabz eylediğim üç şişe derûnunda mevzû‘ yedi yüz miskāl gül yağı semeninden bin beş yüz yetmiş beş guruş ve iki vukıyye tömbeki semeninden yirmi guruş ve nısf deste fes semeninden on iki guruş ki min-haysü’l-mecmû‘ bin altı yü[z] yedi guruşun bin dört yüz guruşunu mersûma def‘ ve teslîm dahi etmişdim lâkin zikr olunan yağlar bu def‘a taraf-ı şer‘-i şerîfden ehl-i hıbreye irâ’e olunarak gül yağı olmayıp kalb verdî olduğu zâhir ve el-yevm yedimde mevcûd olmağla red sadedinde olmuşdum el-hâletü hâzihî beynimiz ıslâh olunup zimmî-i mesfûr zikr olunan yağları geri ahz ve kabûl edip ben dahi mersûma peşinen teslîm eylediğim meblağ-ı merkūm bin dört yüz guruşdan zimmî-i mesfûr ile bi’t-tav‘ ve’r-rızâ altı yüz guruşa sulh olduğumda ol-dahi sulh-i mezkûru ba‘del-kabûl bedel-i sulh-i mezkûrdan mâ‘adâ ziyâdesine ve bi’l-cümle husûs-ı mezkûra müte‘allıka da‘vâdan tarafeynden her birimiz âharın zimmetini kabûlü hâvî ibrâ ve ıskāt eylediğimizden mâ‘adâ bedel-i sulh-i mezkûr altı yüz guruşu zimmî-i mersûmun def‘aten edâya kudreti olmadığından ber-vech-i âtî te’cîle tâlib olduğunda ben dahi meblağ-ı mezkûru beher şehr yirmi beşer guruş verip mecmû‘unu şehr-i âtî kırk iki senesi Muharrem’i gurresinden iki sene hitâmına değin tamâmen edâ ve îfâ etmek üzere rızâmla mersûmu te’cîl eyledim deyu takrîrini mesfûr Bogos zimmî tasdîk ve bedel-i sulh-i mezkûru ikrâr ve i‘tirâf ve ecel-i mezkûru kabûl ve ber-vech-i muharrer müeccelen ve mukassatan edâya ta‘ahhüd eylediği İstanbul Mahkemesi’nden huzûr. Fî 18 Z sene [12]41