İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 123 Hüküm no: 94 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mestçi es-Seyyid Osman Ağa’nın, kahve dükkânı eşyasını es-Seyyid Halil b. Mehmed ile zevcesinden gedik olmak şartıyla aldığı Ma‘rûz Asâkir-i Mansûre-i Muhammediye’den Davud Ağa takımında cânib-i yesârdan altıncı yüz başıda beşinci on başı Kara Hisâr-ı Şarkīli es-Seyyid Halil b. Mehmed nâm kimesne meclis-i şer‘-i münîrde kendi nefsinden asîl ve zevcesi Zeliha Hatun bt. Mehmed Said tarafından husûs-ı âtîde vekîl olduğu zât-ı merkūmu ârifân Hâfız İsmail Efendi b. Abdullah ve Mehmed Nuri b. Mehmed şehâdetleriyle sâbit olan Mestçi es-Seyyid Osman Ağa b. es-Seyyid Halil mahzarında İstanbul’da Sultan Mehmed Hân aleyhi’r-rahmeti ve’l-gufrân hazretleri câmi‘-i şerîfi civârında Deve Hânı kurbünde vâkı‘ bir tarafdan Necîbe Hanım bt. Abdullah Efendi Konağı ve bir tarafdan Sultân Mehmed Hân hazretlerinin imâreti duvarı ve bir tarafdan kafesçi dükkânı ve taraf-ı râbi‘i tarîk-i âm ile mahdûd şehriye altı guruş kirâ-yı kadîmeli mezbûre Necîbe Hanım’ın bâ-temessük-i mütevellî bi’l-icâreteyn mutasarrıfe olduğu bir bâb kahve derûnunda mevcûde aklâm-ı pâdişâhîde mukayyed olmayan beş Kütahya fincanı ve dokuz tombak zarf ve beş germeşik çubuk bir nühâs mangal ve bir çekmece ve sâir âlât-ı lâzıme-i ma‘lûme zevcân-ı mezbûrânın bi’l-münâsafa iştirâken ve şâyi‘an emvâlleri olmağla âlât-ı muharrere-i mezkûre gedik olmak şartıyla mezbûr es-Seyyid Osman Ağa’ya bi’l-asâle ve bi’l-vekâle iki bin üç yüz guruşa iki yüz kırk senesi Zilka‘detü’ş-şerîfesinin on yedinci günü bana bey‘ ve teslîm ben dahi yedinden bi’l-asâle ve bi’l-vekâle ahz ve kabz etmiştim lâkin şart-ı mezkûr ile olan bey‘-i mezbûr fâsid olduğundan mâ‘adâ dükkân-ı mezkûrun mutasarrıfesi mezbûre Necîbe Hanım beni dükkân-ı mezkûrdan ihrâc ve dükkân-ı mezkûru zabt etmekle âlât-ı lâzıme-i muharrere-i mezkûreyi yedimden ba‘de’l-ahz medfû‘um olan meblağ-ı mezkûr iki bin üç yüz guruşu mezbûr es-Seyyid Osman Ağa’dan bi’l-asâle ve bi’l-vekâle taleb ederim deyu tasaddî eylediğim da‘vâmdan bâ-tavassut-ı muslihîn mezbûr es-Seyyid Osman Ağa ile bi’t-tav‘ ve’r-rızâ bin sekiz yüz guruş üzerine sulh olduğumda ol-dahi bi’l-asâle ve bi’l-vekâle sulh-i mezkûru ba‘de’l-kabûl bedel-i sulh-i mezkûrdan mâ‘adâ ziyâdesi olan beş yüz guruşa ve eşyâ-i muharrere-i mezkûreden mâ‘adâ sâir cemî‘-i hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve ıskāt ve her birimiz ber-vech-i muharrer âharın asâleten ve vekâleten ibrâsını kabûl eyledik deyu ba‘de’l-ikrâr ve’t-tasdîk ibrâdan müstesnâ bedel-i sulh-i mezkûr bin sekiz yüz guruşu müdde‘î-i merkūm es-Seyyid Halil edâ ve teslîm-birle eşyâ-i muharrere-i mezkûreyi bi-a‘yânihâ asîl ve vekîl-i mezbûra red ve teslîm etmek üzere tarafeyne tenbîh olunduğu İstanbul Mahkemesi’nden huzûr. Fî 25 Z sene [1]241