İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 167 Hüküm no: 142 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin Mescidi’ni zaviye ittihaz ederek namaz için izin vermeyen eş-Şeyh Abdullah Cemâlî Efendi’nin mahalleden çıkarılması talebi Mahalleden şeyh ihrâcı Ma‘rûz İstanbul’da Tozkoparan kurbünde Sinekli nâm mahalde Kâtib Muslihiddîn Mahallesi İmâmı Ali Efendi b. Hüseyin ve ahâlîsinden es-Seyyid Receb Efendi b. Eyyûb ve Sîmkeş İbrahim Ağa b. Mehmed ve kuzâtdan Hasan Efendi b. Hüseyin ve İbrahim b. Halil ve Çörekçi el-Hâc Mustafa b. Mustafa ve Kavukçu Tahir Ağa b. Hüseyin ve Kavukçu el-Hâc Halil Ağa b. Abdurrahman ve Ali Ağa b. Hüseyin ve Sîmkeş Mehmed Ali Ağa b. Mustafa ve diğer Ali Ağa b. Mustafa ve es-Seyyid Mehmed Ağa b. Ali nâm kimesneler ve sâirleri meclis-i şer‘-i enverde eş-Şeyh Abdullah Cemâlî Efendi b. İbrahim nâm kimesne muvâcehesinde mahalle-i mezbûrede vâkı‘ merkūm Kâtib Muslihiddîn hayâtında binâ ve ihyâsına muvaffak olduğu mescid-i şerîfinde öteden beri derûnunda cemâ‘atle salât-ı mefrûza edâ olunagelir iken mezbûr eş-Şeyh Abdullah Cemâlî Efendi bir müddetden beri mescid-i şerîf-i mezkûru hilâf-ı şart-ı vâkıf zâviye ittihâz ederek zâviyedârlığını ber-takrîb üzerine tevcîh ve berât ettirmiş ise de câhil ve füyûzât-ı tarîkat-i aliyyeden bî-behre ve nâ-ehil olduğundan mâ‘adâ ben tarîkat-i Sa‘diyye’ye müntesibim diyerek bir takım mechûlü’l-ahvâl ricâl ve nisâyı cem‘le hilâf-ı şer‘-i şerîf ve mugāyir-i erkân-ı tarîk harekât-ı nâ-merzıyyeye ictisâr eylediğinden mâ‘adâ mescid-i şerîf-i mezkûru kendüye tahsîs ederek harâb ve derûnunda sünnet-i müekkede olup bu def‘a devâmının ikdâmına bi’d-defe‘ât bâ-fermân-ı âlî memûrlar olduğumuz cemâ‘at ile salât-ı mefrûzayı edâ için küşâd etmeyip sed ve bend eylediğinde bi’d-defe‘ât kendüye nush ve pend olundukda kat‘â mütenassıh olmayıp harekât-ı nâ-merzıyyesinde ısrâr üzere olmağla ol-vechile merkūm eş-Şeyh Abdullah Cemâlî Efendi’den bir türlü emn ve râhatımız yokdur deyu bi’l-müvâcehe sû-i hâlinden bahsle iştikâ ve üzerine ber-takrîb tevcîh ettirdiği zâviye-dârlık ref‘le kaleminden kaydı ref‘ ve terkīn-birle mezbûrun mahalle-i mezbûreden hurûcunu iltimâs eyledikleri İstanbul Mahkemesi’nden huzûr. Fî 13 Za sene [12]41