İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 57 Hüküm no: 1 Orijinal metin no: [1a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giridî Halil Ağa’nın Çarşamba Pazarı civarında sabun satmasına ruhsat verildiği Sabun Nâzırı Rüstem Hoca İstanbul’da Sultân Selim Câmi‘-i şerîfi havâlîsinde sabuncu dükkânı olmadığından kurb ve civârında bulunan ibâdullâh sabun husûsunda müzayakaya giriftâr olduklarına binâen ahâlîsinin taleb ve iltimâslarıyla câmi‘-i şerîf-i mezkûr civârında Çarşamba Pazarı nâm mahâlde muhterik hamam kapısı önüne tabla vaz‘ıyla narh-ı cârîsi üzre sabun bey‘ine ta‘ahhüd ederek tevzî‘den hisse verilmesini Giridî Halil Ağa b. Ali nâm kimesne istid‘â ve merkūm Halil Ağa mahâll-i mezbûrda narh üzere vakıyye ile ibâdullâha sabun bey‘ edip narh-ı cârîden bir akçe ziyâdeye satmayacağına ve memnû‘ olan mahallere dahi bir dâne sabun vermeyeceğine ve aldığı mal-ı tüccârı telef etmeyip vakt ü zamanıyla edâ edeceğine yarar ve mu‘teber kefîl gösterip kendilerini te’mîn eylediğinden itmînân hâsıl eylediklerini sabun tüccârından Ali Ağa ve Mehmed Ağa ve şurût-ı nizâmlarına tatbîk olunarak mezbûrun mahâll-i mezkûrda tabla ile sabun bey‘ine râzı olduklarını sabuncu esnâfı kethudâsı es-Seyyid el-Hâc İbrahim Ağa ve yiğitbaşısı Mehmed Ağa ve esnâfından el-Hâc Ahmed Ağa ve es-Seyyid Mustafa Ağa ve sâirleri ihbâr ve inhâ etmeleriyle fîmâ-ba‘d mezbûr Halil Ağa’ya hilâf-ı nizâm hareket etmemek şartıyla tevzî‘ olunan sabundan sâir tablakârlar misillü hisse i‘tâ eyleyesin. Fî 15 min-Z sene 1242 [1b] Meşreb Efendi-zâde devletlü inâyetlü Abdurrahman Efendi hazretlerinin huzûr-ı semâhat-nüşûrlarında vukū‘ bulan i‘lâmât-ı şer‘iyye-i sicill-i mahfûzlarıdır. Fî 3 M sene [1]242