İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 58 Hüküm no: 2 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Eğinli Bedros’un Çukadar Halil Ağa’dan alacağı olduğunu iddia ettiği Ma‘rûz Âsitâne-i aliyyede vâki‘ Vezîr Hânı sarrâflarından sahib-i arzuhâl Eğinli Bedros v. Melkon nâm zimmî meclis-i şer‘-i enverde derûn-ı arzuhâlde mezkûru’l-isim Çukadâr Halil Ağa b. Mehmed muvâcehesinde ben târih-i i‘lâmdan dört sene mukaddem Anadolu’da Yalı kazâsı umûr-ı ma‘lûmesine dâir bir kıt‘a emr-i âlî ısdâr ettirmek için mâlımdan merkūm Halil Ağa’ya üç yüz guruş verdiğimde ol dahi ahz ü kabz edip lâkin emr-i âlî-şân-ı mezkûru ısdâr ettirmemekle meblağ-ı mezkûr üç yüz guruş[u] merkūm Halil Ağa’dan hâlen istirdâd ederim deyü ba‘de’d-da‘vâ ve’l-inkâr müdde‘î-i mersûm Bedros zimmî ber-vech-i muharrer müdde‘âsına ikāmet-i beyyine edemeyip bi’t-taleb merkūm Halil Ağa bi’l-muvâcehe ber-nehc-i şer‘î tahlîf olunmağın mûcibince müdde‘î-i mesfûr Bedros zimmî da‘vâ-yı mezkûresiyle merkūm Halil Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu El-emr li-veliyyü’l-emr fi’l-yevmi’s-sâlis mine’l-Muharremi’l-harâm sene ihdâ ve erba‘în ve mieteyn ve elf.