İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 58 Hüküm no: 4 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Tevfik b. İbrahim’in vasîsi Naile Hatun bt. Ahmed ile kiracısı Asiye bt. Yusuf arasındaki kira akdinin feshi Ma‘rûz Sahib-i arzuhâl Mehmed Tevfîk b. İbrahim nâm sahib-i arzın min-kıbeli’l-üm ceddesi ve kıbel-i şer‘-i şerîfden vasîyy-i mansûbesi zâtı mu‘arrefe Nâile Hatun bt. Ahmed meclis-i şer‘-i şerîf-i enverde kezâlik zâtı mu‘arrefe Asiye bt. Yusuf nâm hatun muvâcehesinde sagīr-ı mezbûra babasından müntakil İstanbul’da Mollagürânî kurbünde Sarı Musa mahallesinde kâin ma‘lûmü’l-hudûd ve’l-müştemilât bir bâb vakıf menzili bundan akdem beher şehr üçer guruş kirâ kavliyle bi’l-vesâye mezbûre Asiye Hatun’a îcâr ve teslîm ol dahi istîcâr ve tesellüm ve derûnunda temekkün ve istifâ-yı menfa‘at-birle kirâ-yı mezkûru dahi mâh-be-mâh edâ ederek zimmetinde ancak beş aylık on beş guruş kirâ bakī kalmağla meblağ-ı bâkī-i mezkûru sagīr-i mezbûr için bana edâya ve menzil-i mezkûrun dahi sagīr-i mezbûru iskân için lüzûmu olduğundan târih-i i‘lâm şehri gāyetine izâfetle bi’l-vesâye fesh-i akd-i icâre etmemle gāyet-i şehr-i mezbûrda menzil-i mezkûru tahliye ve sagīr-i mezbûr için bana teslîme mezbûre Asiye Hatun’a tenbîh olunmak matlûbumdur deyü da‘vâ ettikde ol dahi cevâbında kazıyye minvâl-i muharrer üzre olduğunu ve meblağ-ı merkūm on beş guruş zimmetinde sagīr-i mezbûra deyni olduğunu ikrâr ve i‘tirâf etmeğin alâ-mûcib-i ikrârihâ bâ-meblağ-ı merkūm on beş guruşu hâlen edâ ve teslîme ve menzil-i mezkûru dahi gāyet-i şehr-i mezbûrda tahliye-birle sagīr-i merkūm için müdde‘iyye-i mezbûre Nâile Hatun’a teslîme mezbûre Asiye Hatun’a tenbîh olunduğu İstanbul Mahkemesi’nden huzûr. Fî 10 M sene [1]242