İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 68 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Mustafa’nın, kiracısı Kirkor v. İstefan’ın kira akdini feshettiği Ma‘rûz Sahibe-i arzuhâl mu‘arrefetü’z-zat Nefise bt. el-Hâc Mustafa nâm hatun meclis-i şer‘-i münîrde Sarrâf Kirkor v. İstefan zimmî muvâcehesinde mahmiye-i İstanbul’da Tahmîs ardında Meydâncık nâm mahâlde kâin bâ-temessük-i mütevellî bi’l-icâreteyn mutasarrıfe olduğum bir bâb vakıf dükkânda mersûm Kirkor zimmî müşâhereten müste’cirim olup lâkin dükkân-ı mezkûrun bana lüzûmu olduğundan târih-i i‘lâm şehri gāyetine izâfetle fesh-i akd-i icâre etmemle gāyet-i şehr-i mezkûrda dükkân-ı mezkûru tahliye ve bana teslîme zimmî-i mesfûra tenbîh olunmak murâdımdır deyü da‘vâ ettikde ol dahi cevâbında fi’l-vâki‘ dükkân-ı mezkûr mezbûre Nefise Hatun’un tasarrufunda olup kendi müşâhereten müste’cir olduğunu ikrâr ve tasdîk edip ancak dükkân-ı mezkûr derûnunda benim hem sarrâf ve hem tütüncü gediğim vardır dedikde evvelen dükkân-ı mezkûrun sarrâf gediği kaydı bâ-hatt-ı hümâyûn-ı şevket-makrûn-ı hazret-i zıllullâhî ref‘ ve terkīn olunduğu mefhûm-ı derkenârdan müstebân ve sâniyen mukayyed tütüncü gediği dahi olmadığı tütüncü esnâfının kethudâsı Osman Ağa ve vekîli es-Seyyid Mustafa Ağa ve yazıcısı es-Seyyid Mehmed Nuri Efendi ve yiğitbaşısı Ahmet Çelebi ve sâir lonca ihtiyârlarının meclis-i şer‘-i şerîfde bi’l-muvâcehe ihbârlarıyla nümâyân olmağın bu sûretde dükkân-ı mezkûrun sarrâf gediği mahv olunmuş olduğu ve kalemde mukayyed olmayan tütüncü gediği dahi şer‘an ve kānûnen mu‘teber olmadığı mersûm Kirkor zimmîye tefhîm ve dükkân-ı mezkûrda bir gûne alâkası olmamağla gāyet-i şehr-i mezbûrda tahliye ve mutasarrıfesi müdde‘iyye-i mezbûre Nefise Hatun’a teslîme tenbîh olunduğu İstanbul <> Mahkemesi’nde[n] huzûr. Fî 11 M sene [1]242