İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 69 Hüküm no: 19 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı ve temizleyici esnafından bazı kimselerin, usûle aykırı üretim yaptıkları ve esnaf bünyesinden ihraçları Ma‘rûz Âsitâne-i aliyyede vâki‘ sandalcı esnâfı kethudâsı es-Seyyid Mehmed Emin Ağa ve yiğitbaşıları Ebîbekir Ağa ve Mehmed Ağa ve müsinn ü ihtiyârlarından es-Seyyid el-Hâc Abdullah Ağa ve Hâfız Mustafa Ağa ve Mahmud Ağa ve Ahmed Ağa ve el-Hâc Ahmed Ağa ve Mehmed Said Ağa nâm kimesneler ile re‘âyâdan Aşçıbaşı Vasil ve Takofilo ve Kostaki ve Andon ve Panayot ve Artin zimmîler ve sâirleri meclis-i şer‘-i münîrde esnâf-ı merkūmeden Kumkapı’da mütemekkin beş destgâha mâlik Polidi v. Yorgi ve Fazlı Paşa’da mütemekkin üç destgâha mâlik Aci Vasil v. Yani ve Fazlı Paşa’da mütemekkin dört destgâha mâlik Yorgi v. Kiryako nâm zimmîler ile esnâf-ı merkūmeye mültehık temizleyici tâifesinden Kumkapılı Nişan v. Haçador zimmî muvâcehelerinde işbu yedimizde olup meclis-i şer‘-i şerîfde kırâet olunan bâlâsı tuğrâ-yı garrâ-yı şehin-şâhî ile müzeyyen bir kıt‘a fermân-ı celîlü’ş-şânda tafsîl ve beyân kılındığı üzre metâ‘ımız olan İstanbul şâlîsi ve gezi ve sâir envâ‘-ı akmişenin boyası kalb ve redî olmayıp gāyetü’l-gāye hâs olmak ve eğer hilâf-ı rızâ-yı âlî kalb boya i‘mâl ederi olur ise tedîb ve esnâfımızdan tard ve ihrâc olunmak emr-i âlîde münderic şurût-ı nizâmımızdan ve hâzır-ı mersûm Nişan zimmînin dahi boya boyamak san‘atı değil iken eydî-i ibâdullâhda tutulup meclis-i şer‘a ihzâr ve muvâcehelerinde mu‘âyene olunan kumaşların ipeğini kalb veredî boyayıp mersûmdan Polidi ve Vasil [4b] ve Yorgi zimmîler dahi bilerek ol ipeklerden kumaş nesc ve i‘mâl ve ibâdullâha bey‘ ederken tutulmağla bu keyfiyet nizâmımızın ihtilâliyle fîmâ-ba‘d metâ‘ımıza nâsın rağbet etmemesini ve bu cihetle cümlemizin mağdûriyetimizi mûcib ve bilmeyerek iştirâ eden ibâdullâhın mağbûn ve rahne-dâr olmasını müstevcib bir hâlet-i rûhiye olmağla sıyâneten li’l-ibâd ve hıfzan li’n-nizâm mersûmûnun ber-mûcib-i fermân-ı âlî-şân esnâfımızdan tard ve ihrâc olunması matlûbumuzdur deyü muvâcehesinde sû’-i hâlini inhâ ile iştikâ ve ihrâclarını istid‘â eylediklerinde onlar dahi cevâblarında mazmûn-ı emr-i âlî-şân<<ı>> ber-vech-i muharrer hilâf-ı emr-i âlî ve mugāyir-i nizâm-ı kadîm hareket ile mu‘âyene olunan kalb ve redî kumaşları kendileri boyayıp nesc ve i‘mâl eylediklerini ikrâr ve i‘tirâf etmeleriyle bu sûretde mersûmûnun li-ecli’t-tedîb esnâfdan ihrâc olunmak muktezâ-yı emr-i âlî-şân idüğü İstanbul Mahkemesi’nden huzûr. Fî 7 M sene [1]242