İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 70 Hüküm no: 20 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Mehmed Salih Ağa b. Osman’ın, Esad Ağa’dan ulufeye mahsuben aldığı esameyi iade ettiği Ulûfe Reddi Ma‘rûz Sahib-i arzuhâl Çukadâr Mehmed Salih Ağa b. Osman meclis-i şer‘-i münîrde derûn-ı arzuhâlde mezkûru’l-ism Asâkir-i Mansûre-i Muhammediye mehterbaşısı es-Seyyid el-Hâc Es‘ad Ağa b. Mehmed Emin muvâcehesinde mezbûr es-Seyyid el-Hâc Es‘ad Ağa silâhdâr ocağına merbût olmak üzre cânib-i mîrîden alınacak doksan yedi akçe ulûfesini sene-i sâbıkā Ramazanında bin dokuz yüz kırk guruşa bana bey‘ ve semen olmak <<üzre>> zu‘muyla mâlımdan ol mikdâr guruşumu ahz etmişdi lâkin bey‘-i mezkûr sahîh olmadığından el-hâletü hâzihî verdiği esâme kâğıdlarını alıp meblağ-ı merkūmu bana red ve teslîm[e] mezbûr es-Seyyid el-Hâc Es‘ad Ağa’ya tenbîh olunmak matlûbumdur deyü da‘vâ ettikde ol dahi cevâbında vech-i meşrûh üzre ulûfe-i mezkûreyi müdde‘î-i mezbûra bey‘ini ve semen olmak üzre ol mikdâr guruşu ahzını ikrâr ve i‘tirâf etmeğin bu sûretde ulûfe-i mezkûre sıla ve atâyâ makūlesinden olup ber-muktezâ-yı şerî‘at-ı garrâ bey‘i câiz olmamağla zikrolunan esâme kâğıdlarını geri alıp semen olmak zu‘muyla makbûzu olan meblağ-ı merkūm bin dokuz yüz kırk guruşu alâ-mûcib-i ikrârihî müdde‘î-i mezbûr Mehmed Salih Ağa’ya tamamen red ve teslîme merkūm es-Seyyid el-Hâc Es‘ad Ağa’ya tenbîh olunduğu İstanbul Mahkemesi’nden huzûr. Fî 20 M sene [1]242