İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 72 Hüküm no: 22 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Hüseyin Ağa b. Mehmed’in, ulufeye mahsuben Hüseyin Ağa b. Hüseyin’den aldığı esamenin bedelini talep ettiği Esâmî semenini red Ma‘rûz Sahib-i arzuhâl Çukadâr Hüseyin Ağa b. Mehmed meclis-i şer‘-i münîrde ismi mezkûr sipâhi çavuşlarından Hüseyin Ağa b. Hüseyin muvâcehesinde merkūm Hüseyin Ağa sipâhi ocağına merbût olmak üzre cânib-i beytü’l-mâlden alınacak yevmî otuz yedi akçe ulûfesini iki sene mukaddem altı yüz yirmi yedi buçuk guruşa bana bey‘ ve semen olmak zu‘muyla mâlımdan ol mikdâr guruşumu ahz edip lâkin bey‘-i mezkûrun adem-i sıhhatine binâen verdiği esâme kâğıdlarını alıp semen olmak üzre makbûzu olan meblağ-ı merkūm altı yüz yirmi yedi buçuk guruşu bana red ve teslîme mezbûr Hüseyin Ağa’ya tenbîh olunmak matlûbumdur deyü da‘vâya tesâddî etmişdim el-hâletü hâzihî meblağ-ı merkūmun yüz yetmiş altı guruşu mutâlebesinden kabûlü hâvî merkūm Hüseyin Ağa’nın zimmetini ibrâ ve ıskāt etmemle mâ‘adâsı olan dört yüz elli bir buçuk guruşu merkūmdan hâlâ taleb ederim deyü da‘vâ ol dahi cevâbında kazıyye minvâl-i muharrer üzre olduğunu ikrâr ve i‘tirâf etmeğin bu sûretde ulûfe-i mezbûre sıla ve atâyâ makūlesinden olup şer‘an bey‘i sahîh olmamağla sâlifü’z-zikr esâme kâğıdlarını geri alıp semen olmak üzre makbûzu olup ibrâ olunandan mâ‘adâsı olan meblağ-ı merkūm dört yüz elli bir buçuk guruşu ber-mûcib-i ikrâr müdde‘î-i mezbûr Hüseyin Ağa’ya tamamen red ve teslîme merkūm Hüseyin Ağa’ya tenbîh olunduğu İstanbul Mahkemesi’nden huzûr. Fî 22 M sene [12]42