İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 71 Hüküm no: 21 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülhamid Efendi b. Ahmed ile zevcesinin eski evlerini yıkarken komşu eve zarar verdikleri ve zararın tazmini Ma‘rûz Sâdır olan fermân-ı âlîlerine imtisâlen zikri [âtî] husûsu mahâllinde lede’l-mu‘âyene keşf ve tahkīk için savb-ı şer‘-i enverden irsâl olunan Kâtib es-Seyyid Mehmed Tahir Efendi hâssa mi‘mârı hulefâsından es-Seyyid Ali Necib ve Ali Namık Halîfeler ile nezâret-i dâ‘iyânemde olan evkāfdan ashâb-ı hayrâtdan merhûm Rıdvan Halîfe Vakfı müsakkafâtından İstanbul’da Kumkapı kurbünde Dülbendci Hüsameddin mahallesinde hisar dibi civârında vâki‘ taraf-ı yemîni yine vakf-ı mezbûrdan Bâbu’s-sa‘âdeti’ş-şerîfe ağası muhâsebe-i evkāf kâtibi Abdülhamid Efendi b. el-Hâc Ahmed ile zevcesi Zeyneb bt. Mehmed Emin nâm hatunun bâ-temessük-i mütevellî bi’l-icâreteyn iştirâken tasarruflarında olan menzil ve taraf-ı yesârı yine vakf-ı mezbûrdan Emine Hanım’ın tasarrufunda olan menzil ve verâsı yine vakf-ı mezbûrdan onar akçe Yusuf Ağa menzili ve taraf-ı râbi‘i tarîk-ı âm ile mahdûd bir bâb menzile varıp cerîdede mazbûtü’l-esâmî Müslimîn huzûrlarında ba‘de akdi’l-meclis menzil-i mahdûd-ı mezkûra bi’l-intikāl iştirâken mutasarrıflar olan sagīr Mustafa ve sagīre Esma ibney Veliyüddin Çavuş’un anaları ve kıbel-i şer‘den mansûbeten vasîleri sahibe-i arzuhâl mu‘arrefetü’z-zat Şerife Fâtıma bt. es-Seyyid Hüseyin meclis-i ma‘kūd-ı mezkûrda vakf-ı mezbûrun kāimmakām-ı mütevellîsi Mûytâb el-Hâc İsmail Ağa b. Ali hazır olduğu hâlde kendi nefsinden asîl ve zevcesi merkūme Zeyneb Hatun tarafından husûs-ı âti’l-beyânda vekîl olduğu zâtını ârifân el-Hâc Sâdık Ağa b. Mehmed Emin ve Berber Mustafa Râşid Ağa b. Mehmed şehâdetleriyle sâbit olan merkūm Abdülhamid Efendi muvâcehesinde vasîleri olduğum evlâdım sagīrân-ı mezbûrânın ber-vech-i muharrer mutasarrıflar oldukları menzil ile merkūm Abdülhamid Ağa ile zevcesi müvekkile-i mezbûrenin kezâlik mutasarrıflar oldukları menzil harâb ve köhne olarak birbirine mâil ve müstenid iken merkūm Abdülhamid Ağa bu esnâda menzilini ta‘mîr ederken sagīrân-ı merkūmânın mutasarrıflar oldukları işbu meclis-i şer‘-i âlî olunan menzilin ba‘zı mahallerine mancınık vaz‘ıyla kendi menzilini hedm ve binâ edip lâkin ber-vech-i muharrer menzilini hedm ederken vasîleri olduğum sagīrân-ı mezbûrânın mutasarrıflar oldukları menzilin işbu mu‘âyene olunan mi‘mârân-ı merkūmân misâhalarıyla yüz otuz zirâ‘ tabaka-i ulyâ ve vustâ<> ve süflâ dolma dîvârı münhedim olup tuğla ve enkāz-ı atîkasını ahz etmekle zikrolunan yüz otuz zirâ‘ dolma dîvârı inşâya merkūm Abdülhamid Ağa’ya bi’l-vesâye tenbîh olunmak murâdımdır deyü kāimmakām-ı mezbûrun tasdîkiyle da‘vâ ve merkūm Abdülhamid Ağa dahi ber-vech-i muharrer tasdîk eylediklerini kâtib-i merkūm dâ‘îleri mahâllinde ba‘de’l-mu‘âyene ve’t-tahrîr ma‘an meb‘ûs ümenâ-i şer‘le meclis-i şer‘a gelip tarafeyn muvâcehelerinde alâ-vukū‘ihî ba‘de’l-inhâ ve’t-tasdîk muslihûn tavassutuyla beynleri ıslâh ve te’lîf olunup merkūm Abdülhamid sâlifü’z-zikr yüz otuz zirâ‘ münhedim dolma dîvârı ancak kendi mâlından beş altı direk vaz‘ıyla [5a] mevcûd tuğla ve enkāz-ı atîkasıyla kendi mâlından teberru‘an sarf ederek ke’l-evvel binâ ve inşâya müte‘ahhid olduğunda müdde‘iyye-i vasîyy-i mezbûre Fâtıma Hatun dahi vech-i meşrûh üzre râzıye olup ta‘ahhüdünü kabûl edip bu vechile kat‘-ı münâza‘a eyledikleri İstanbul Mahkemesi’nden huzûr. Fî 11 M sene [1]242