İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 82 Hüküm no: 33 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahvehane zannıyla kapatılan berber dükkânının tekrar açılmasına izin talebi Berber dükkânı sehve mebnî kahve dükkânı diyerek sed olmağla geri küşâdına izni hâvî istid‘â Ma‘rûz Sâdır olan fermân-ı âlîlerine imtisâlen işbu arzuhâle ve derkenâra ba‘de’n-nazar sahib-i arzuhâl Süleyman ve Mehmed kulları nezd-i dâ‘iyâneme celb ile suâl olundukda bundan akdemce celâdet-pâş-ı sahîfe-i sudûr olan fermân-ı cihân-mutâ‘ mûcibince mecmû‘-ı kahvehâneler külliyen sedd ü bend olunduğu esnâda ber-mantûk-ı derkenâr gediğine iştirâken mâlikler oldukları İstanbul’da Kumkapı hâricinde vâki‘ Başmuhâsebe’de Simyon zimmî ismine mukayyed ve taht-ı nizâma dâhil ve mu‘teber bir bâb yüksek berber dükkânı dahi hîn-i tahrîrde sehv olunduğuna mebnî me’mûrîn ma‘rifetleriyle sedd ü bend ve ocağı hedm olunmuş olduğu beyânıyla kaydı mûcibince dükkân-ı mezkûrun kemâ-kân berber dükkânı olmak üzre küşâdına izin ve ruhsat-ı seniyyeleri erzânî buyurulmak bâbında inâyet recâ ve fi’l-vâki‘ muhâsebe-i mezbûrede zimmî-i mersûm ismine mukayyed berber dükkânı işbu dükkân olduğunu ve gediği dahi tedâvül-i eydî ile şirâen el-yevm mezbûrânın mülkleri olduğuna binâen kemâ-kân berber dükkânı olarak küşâdında bir gûne beis ve mahzûr olmadığını esnâf-ı merkūme kethudâsı İbrahim Ağa ve yiğitbaşısı es-Seyyid Mehmed Nuri Ağa ve şeyhi Musa Efendi ve du‘âcısı İsmail Efendi ve çavuşu Mustafa Ağa ve sâir nizâm ustaları ihbâr ve inhâ eyledikleri ma‘lûm-ı âsafâneleri buyruldukda niyâzına müsâ‘ade-i merhamet-âde-i seniyyeleri erzân buyurulmak menût-ı re’y-i sâmîleri idüğü İstanbul Mahkemesi’nden huzûr. Fî 7 S sene 1242