İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 83 Hüküm no: 34 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapı’daki dükkânı yanan Berber Ahmed’in, gediğini başka yere nakletmek istediği Berber gediği nakli Ma‘rûz Sâdır olan fermân-ı âlî-şâna imtisâlen işbu arzuhâl ve derkenâra merbût olan hüccet-i şer‘iyyeye nazar olundukda İstanbul’da Kumkapı kurbünde İbrahim Paşa Câmi‘-i şerîfi civârında keresteci karşısında Seyyid Mustafa Usta’nın üst yanında kâin Başmuhâsebe’de Mehmed ismine mukayyed şurût-ı nizâma dâhil ve mu‘teber bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme mezbûr Mehmed Usta’nın fevtinden sonra veresesinden bâ-hüccet-i şer‘iyye şirâen mâlı iken dükkân-ı mezkûr bundan akdem ol havâlîde bi-kazâillâhi te‘âlâ vukū‘ bulan harîkde muhterik oldukda mülk sahibi binâdan imtinâ‘ ve binâ eylediği takdîrce kirâ-yı kadîminden ziyâde mutâlebe eylediğine binâen harîkden tahlîs olunmuş olan âlât-ı gedik-i mezkûrun şurût-ı nizâma tatbîkan mahâll-i âhara nakli lâzım geldiği beyânıyla kurb ve civârında keresteci dükkânı karşısında tabîb ve terzi dükkânları beynlerinde kâin bâ-temessük-i mütevellî bi’l-icâreteyn tasarrufunda olup derûnunda kimesnenin mu‘teber gediği olmayan bir bâb dükkâna nakille ismine tashîhan kayd ve şurûtu mûcibince nakli derciyle yedine sûret i‘tâsını sahib-i arzuhâl Berber Ahmed istid‘â eylediği mefhûm-ı arzuhâlden müstebân ve fi’l-vâki‘ gedik-i mezbûr kalem-i mezbûrda mukayyed ve taht-ı nizâma dâhil ve mu‘teber kadîm gediklerden ve bu makūle mukayyed berber gediklerinin nakl ve ismine tasrîhan sûret i‘tâsı iktizâ ettikde taraf-ı şer‘den ba‘de’l-i‘lâm sûret verilmek şurûtundan olduğu derkenârdan müstefâd ve nümâyân ve gedik-i mezkûr huzûr-ı şer‘-i şerîfde ibrâz ve kırâet olunan hüccet-i şer‘iyye mûcibince el-yevm sahib-i arzuhâl mezbûr Ahmed’in şirâen mâlı olduğu esnâf-ı merkūme kethudâsı İbrahim Ağa ve şeyhi Musa Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Mustafa Ağa ve köşe ustası Selim Ağa ve sâir nizâm ustalarının ihbârlarıyla zâhir ve a‘yân olmağın bu sûretde istid‘âsı şurût-ı nizâma muvâfık olduğundan müsâ‘ade-i seniyyeleri erzânî buyurulup gedik-i mezkûrun kayd-ı evveli ref‘ ve terkīn ve dükkân-ı sânî-i mezkûra nakl ile mâliki mezbûr Berber Ahmed ismine tashîhan kayd ve yedine bir kıt‘a sûret i‘tâsı iktizâ eylediği İstanbul Mahkemesi’nden huzûr. Fî 9 S sene [1]242