İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 113 Hüküm no: 65 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahvehane zannıyla kapatılan berber dükkânının yeniden açılması için izin talebi Kahvehâne olmayıp kadîm berber dükkânı olduğu ba‘de’l-ihbâr küşâdına izn-i istid‘â Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar ve sahib-i arzuhâl Süleyman kullarıyla berberler kethudâsı İbrahim Ağa ve şeyhi Musa Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Mustafa Ağa ve köşe ustası Selim Ağa ve sâir lonca ihtiyârları nezd-i dâ‘iyâneme celb ile keyfiyet suâl olundukda bundan akdemce mehâbet-rîz-i sahîfe-i sudûr olan fermân-ı âlem-mutâ‘larına imtisâlen mecmû‘-ı kahvehâneler sedd ü bend olunduğu esnâda sahib-i arzuhâl-i mezbûr kullarının Kumkapı hâricinde vâki‘ mutasarrıf ve gediğine mâlik olduğu Başmuhâsebe’de mukayyed taht-ı nizâma dâhil ve mu‘teber bir bâb kadîm berber dükkânı dahi sehve mebnî kahvehâne zannıyla sedd ü bend ve ocağı hedm olunmuş olduğu beyânıyla fakr-ı hâline merhameten dükkân-ı mezkûrun küşâdına izin ve ruhsat-ı seniyye-i veliyyü’n-ni‘amâları inâyet ve ihsân buyurulmasını niyâz ve istid‘â ve fi’l-vâki‘ gedik-i mezkûr hâmiş-i arzuhâlde mastûr derkenâr nâtık olduğu üzre muhâsebe-i merkūmede Mehmed Usta ismine mukayyed ve mu‘teber olduğunu esnâf-ı merkūmûn ihbâr ve inhâ etmişler ise de metn-i arzuhâlde Kumkapı hâricinde Arab Hânı tahtında Mehmed Usta dükkânı ve ibâre-i derkenârda yalnız Kumkapı hâricinde Mehmed Usta dükkânı deyü muharrer olup Arab Hânı tahtı ta‘bîri olmadığından terk olunmağla bi’l-mu‘âyene gereği gibi tahkīk için Kâtib es-Seyyid Salih Afîf Efendi dâ‘îleri ve esnâf-ı merkūme mahâlline irsâl olundukda onlar dahi varıp mu‘âyene ve kurb ve civârında bulunan dükkân ashâbından suâl eylediklerinde fi’l-asl dükkân-ı mezkûr fevkinde Arab Hânı demekle meşhûr ahşab hân olup ba‘dehû mukaddemâ vukū‘ bulan harîkde muhterik olmuş ve yerine hân binâ olunmayarak yalnız bir sırada dört beş dükkân binâ olunmuş idüğünü ve bâb-ı mezkûr hâricinde bundan başka Mehmed Usta ismine âhar berber dükkânı olmadığını ihbâr eylediklerini kâtib-i mûmâ-ileyh dâ‘îleri meclis-i şer‘a inhâ etmeğin bu sûretde şekden kurtulduğu ma‘lûm-ı ilm-i âlem-ârâları buyruldukda ber-vech-i istid‘â müsâ‘ade-i seniyyeleri erzân buyurulmak mutlaka re’y-i rezîn-i düstûrânelerine menût idüğü İstanbul Mahkemesi’nden huzûr. Fî 17 min-S sene 1242