İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 161 Hüküm no: 105 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Fâtıma Kadın’ın, Yeniköy’de bir kısmına malik olduğu çörekçi fırının arkasındaki bahçeyi ifraz talebi ve talebin reddi Yeniköy’de çörekçi fırını keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde keşf ve mu‘âyene ve ber-nehc-i şer‘î istimâ‘ için savb-ı şer‘-i enverden me’zûnen mürsel Kâtib es-Seyyid Salih Afîf Efendi dâ‘îleri diğer arzuhâl bâlâsına sâdır olan emr-i âlî-şânla bi’l-ma‘iye rü’yete me’mûrlar hâlâ Galata Kādısı Âşir Efendi-zâde fazîletlü Mehmed Tâceddin Efendi tarafından mürsel Kâtib es-Seyyid Mehmed Râşid Efendi ve nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından mürsel Kâtib es-Seyyid Mustafa Efendi ve hâssa mi‘mârı hulefâsından İsmail Kemâlî ve Mehmed Necib Halîfeler ile mahrûse-i Galata’ya muzâfe İstinye nâhiyesine tâbi‘ Yeniköy’de mahkeme karşısında köşede vâki‘ zikri âtî münâza‘un-fîh olan çörekçi fırınına varıp huzûr-ı Müslimînde akd-i meclis-i şer‘-i âlî ettiklerinde sahibe-i arzuhâl Saraylı Fatma Kadın bt. Abdullah’ın zevci tarafından husûs-ı âtîde vekîl olduğu zâtını ârifân Süleyman Ağa b. Ahmed ve Hasan Ağa b. Ahmed nâm kimesneler şehâdetleriyle sâbit olan hâssa hasekilerinden Ahıskavî Ahmed Ağa b. Mehmed meclis-i ma‘kūd-ı mezkûrda Kayyım Molla Mehmed b. Hüseyin nâm kimesne muvâcehesinde nezâret-i hazret-i müşârün-ileyhde âsûde evkāfdan ashâb-ı hayrâtdan Yoklamacı Mustafa Efendi Vakfı’nın kāimmakām-ı mütevellîsi Mehmed Emin Ağa ile fırın-ı mezkûr derûnunda mevcûde Başmuhâsebe’de mu‘teber gedik ta‘bîr olunur âlât-ı lâzıme-i ma‘lûmenin mâliki Osman b. Süleyman nâm kimesneler hazır oldukları hâlde işbu derûnunda akd-i meclis-i şer‘-i âlî olunan bir bâb çörekçi fırınının nısf-ı şâyi‘i zevcem müvekkile-i mezbûrenin mülkü ve nısf-ı âharı dahi şâyi‘an mûmâ-ileyh Mustafa Efendi’nin vakf-ı müsecceli olarak mezbûr Molla Mehmed’in bâ-temessük-i mütevellî bi’l-icâreteyn tasarrufunda olmağla her ne kadar mütevellî ve mutasarrıf ve müste’cir-i merkūmûnun rızâları yoğise de mücerred fırın-ı mezkûr verâsında kâin müvekkilem mezbûrenin âhar vakıfdan tasarrufunda olan yalının selâmlık bağçesi tarafından nısfı müvekkilem mezbûrenin hisse-i memlûkesi’çün ve nısf-ı âharı dahi vakıf için cebren ifrâz ve taksîm olunmak bi’l-vekâle matlûbumdur dedikde evvelâ fırın-ı mezkûrda her birinin hissesi kısmet muhtemel olmayan şüyû‘ ile şâyi‘a olduğundan nasîbleriyle intifâ‘ maksûd-ı bâkī ve mümkün olur mertebe kābil-i kısmet olmayıp tarafeyne zararı müştemil ve her vechile taksîmi vakf-ı şerîfe muzır olacağı zâhir ve mi‘mârân-ı mezbûrân ve sâir bî-garaz ehl-i vakf [vukūf] ihbârlarıyla mütehakkık olduğuna binâen mütevellî ve mutasarrıf ve müste’cir-i merkūmûn kısmete râzı olmadıklarını mevlânâ-yı mûmâ-ileyhim mahâllinde ketb ü tahrîr ve ma‘an meb‘ûs ümenâ-i şer‘le bi’t-terâzî dâ‘îhânelerinde ma‘kūd meclis-i şer‘-i şerîfe gelip tarafeyn ve vâkıf-ı mûmâ-ileyh Mustafa Efendi tarafından vekîl-i mürseli Mehmed Efendi hazır oldukları hâlde tasdîklerine mukārin alâ-vukū‘ihî inhâ ve takrîr etmeleriyle bu sûretde ber-muktezâ-yı şerî‘at-i garrâ taksîmi vakfa muzır olup kābil-i kısmet dahi değil iken cebren taksîme kādir olmadığı vekîl-i mezbûra tefhîm olunduğu İstanbul Mahkemesi’nden huzûr. Fî 26 Ra sene 1242